Biocon : देशातील आघाडीची बायोफार्मा कंपनी ‘बायोकॉन’मध्ये ऐतिहासिक नेतृत्वबदलाची घोषणा करण्यात आली आहे. गेल्या ४८ वर्षांपासून कंपनीचे नेतृत्व करणाऱ्या संस्थापक किरण मजूमदार-शॉ यांनी निवृत्तीचे संकेत देत आपल्या उत्तराधिकाऱ्याच्या नावाची अधिकृत घोषणा केली आहे. किरण मजूमदार-शॉ यांची पुतणी क्लेअर मजूमदार आता सुमारे ६० हजार कोटी रुपयांचे मार्केट कॅप असलेल्या या दिग्गज कंपनीची कमान सांभाळणार आहेत. किरण मजूमदार-शॉ यांनी सार्वजनिकरीत्या उत्तराधिकारी नामनिर्देशित करण्याची ही पहिलीच वेळ आहे. या निर्णयामुळे बायोकॉनचे नेतृत्व पुन्हा एकदा एका सक्षम महिलेच्या हाती राहणार असल्याचे स्पष्ट झाले आहे. कोण आहेत क्लेअर मजूमदार? क्लेअर मजूमदार या सध्या नॅस्डॅक (Nasdaq) सूचीबद्ध कंपनी ‘बिकारा थेरेप्यूटिक्स’च्या सीईओ आहेत. त्यांच्याकडे दांडगा शैक्षणिक आणि व्यावसायिक अनुभव आहे. मॅसॅच्युसेट्स इन्स्टिट्यूट ऑफ टेक्नॉलॉजी (MIT) मधून बायोलॉजिकल इंजिनिअरिंगमध्ये पदवी घेतलेली आहे. स्टॅनफोर्ड ग्रॅज्युएट स्कूल ऑफ बिझनेसमधून एमबीए आणि स्टॅनफोर्ड स्कूल ऑफ मेडिसिनमधून कॅन्सर बायोलॉजीमध्ये पीएचडी केली आहे. बायोकॉनच्या पाठबळावर असलेल्या ‘बिकारा थेरेप्यूटिक्स’चे त्यांनी यशस्वी नेतृत्व केले आहे. भविष्यासाठी सक्षम फळी सज्ज – कंपनीच्या भविष्यातील विस्तारासाठी एक विशेष संरचना तयार करण्यात आली आहे. यामध्ये क्लेअर यांचे बंधू एरिक मजूमदार (कॅलिफोर्निया इन्स्टिट्यूट ऑफ टेक्नॉलॉजीमधील एआय तज्ज्ञ) आणि त्यांचे पती थॉमस रॉबर्ट्स (मॅसॅच्युसेट्स जनरल हॉस्पिटलमधील ऑन्कोलॉजिस्ट) यांचाही समावेश असेल. का केली क्लेअर यांची निवड? ७३ वर्षीय किरण मजूमदार-शॉ यांना कोणतीही अपत्ये नाहीत. ‘फॉर्च्युन इंडिया’ला दिलेल्या मुलाखतीत त्यांनी स्पष्ट केले की, “बायोकॉनची मालकी माझ्याकडे आहे आणि ही कंपनी सुरक्षित आणि सक्षम हातांत सोपवणे माझी जबाबदारी आहे. क्लेअरने ती एक उत्तम कंपनी चालवू शकते, हे सिद्ध केले आहे. तिच्या नेतृत्वक्षमतेवर माझा पूर्ण विश्वास आहे.” कंपनीची नवी रणनीती आणि बदल – बायोकॉन सध्या आपल्या व्यवसायाची पुनर्रचना करत असून, जेनेरिक आणि बायोलॉजिक्स व्यवसायांचे विलीनीकरण करण्यात आले आहे. कंपनीचे मुख्य लक्ष आता ‘बायोसिमिलर्स’वर असून त्यातून मोठ्या महसुलाची अपेक्षा आहे. यासोबतच समूहातील इतर कंपन्यांच्या नेतृत्वातही बदल झाले आहेत. श्रीहास तांबे हे बायोकॉन बायोलॉजिक्सचे सीईओ आणि एमडी. तर सिद्धार्थ मित्तल १ जुलैपासून सिंजीन इंटरनॅशनलचे प्रमुख म्हणून पदभार स्वीकारतील. शेअर बाजारात सकारात्मक प्रतिसाद – उत्तराधिकाराच्या या वृत्तानंतर शेअर बाजारात बायोकॉनच्या शेअर्समध्ये तेजी पाहायला मिळाली. मंगळवारी मुंबई शेअर बाजारात (BSE) कंपनीचा शेअर १ टक्क्यांहून अधिक वाढीसह ३६५.५५ रुपयांवर व्यवहार करत होता.
