इंदापूर : पुणे-सोलापूर राष्ट्रीय महामार्गावरील बिजवडी जवळील राजवडीपाटी येथे सर्व्हिस रस्त्याच्या कामादरम्यान मातीचा भराव कोसळून झालेल्या दुर्घटनेत एका मजुराचा दुर्दैवी मृत्यू झाला, तर दुसऱ्या मजुराला सुखरूप बाहेर काढण्यात आले आहे. दुर्घटनेची माहिती मिळताच राज्याचे कृषिमंत्री दत्तात्रय भरणे यांनी घटनास्थळी धाव घेत परिस्थितीची पाहणी केली. संबंधित अधिकाऱ्यांकडून दुर्घटनेची सविस्तर माहिती घेत बचावकार्याला प्राधान्य देण्याच्या तसेच कामगारांच्या सुरक्षिततेसाठी आवश्यक उपाययोजना करण्याच्या सूचना त्यांनी दिल्या.

या दुर्घटनेत मशरफुल शेख (वय २०, रा. पश्चिम बंगाल) याचा मृत्यू झाला, तर अख्तर (वय २०, रा. पश्चिम बंगाल) हा जखमी झाला आहे. जखमी मजुरावर इंदापूर उपजिल्हा रुग्णालयात उपचार सुरू आहेत. दुर्घटनेतील जीवितहानीबद्दल दुःख व्यक्त करत कृषिमंत्री भरणे यांनी या घटनेतील दोषींवर कारवाई केली जाईल, असे सांगितले.

बिजवडी येथे पुणे-सोलापूर महामार्गाच्या सर्व्हिस रस्त्याचे काम सुरू असताना अचानक मातीचा मोठा भराव कोसळला. या दुर्घटनेत तीन मजूर मातीच्या ढिगाऱ्याखाली अडकण्याची परिस्थिती निर्माण झाली होती. त्यापैकी एका मजुराने वेळीच बाजूला होऊन स्वतःचा बचाव केला. मात्र, उर्वरित दोन मजूर मातीच्या ढिगाऱ्याखाली अडकले.

बिजवडी येथील दुर्घटनेची माहिती कृषिमंत्री भरणे यांनी राज्याच्या उपमुख्यमंत्री सुनेत्रा पवार यांना दूरध्वनीवरून दिली. यावेळी इंदापूरचे तहसीलदार, गटविकास अधिकारी व पोलीस अधिकारी, गावकरी मोठ्या संख्येने उपस्थित होते.

कामगारांच्या सुरक्षेचा प्रश्न

महामार्गावरील विकासकामे वेगाने सुरू असताना कामगारांच्या सुरक्षिततेचा प्रश्न पुन्हा एकदा ऐरणीवर आला आहे. रस्ते, पूल आणि इतर पायाभूत सुविधांची उभारणी करताना कामगारांच्या जीविताचे संरक्षण करणे ही संबंधित यंत्रणांची मूलभूत जबाबदारी आहे. मातीचा भराव कोसळण्यासारख्या दुर्घटना टाळण्यासाठी कामाच्या ठिकाणी सुरक्षा नियमांची काटेकोर अंमलबजावणी, तांत्रिक देखरेख आणि आवश्यक प्रतिबंधात्मक उपाययोजना करणे गरजेचे आहे.

तर दुर्घटना टळली असती

पुणे-सोलापूर राष्ट्रीय महामार्गावर राजवडीपाटी येथे सेवा रस्त्याचे काम सुरू असताना उड्डाणपुलावरून अवजड वाहनांची वाहतूक सुरू होती. पुलाच्या भराव्यालगत सुरू असलेल्या कामाच्या ठिकाणी वाहनांच्या सततच्या वर्दळीमुळे हादरे बसून मातीचा भराव कोसळल्याचा आरोप स्थानिकांनी केला आहे. पुलावरील वाहतूक सेवा रस्त्यावरून वळवून कामाच्या ठिकाणी आवश्यक सुरक्षा उपाययोजना केल्या असत्या, तर ही दुर्घटना टळली असती, अशी भावना व्यक्त होत आहे. काम सुरू असताना उड्डाणपुलावरील वाहतूक बंद करण्याची मागणी वारंवार करूनही संबंधित ठेकेदाराने त्याकडे दुर्लक्ष केल्याचा आरोप काँग्रेसचे तालुकाध्यक्ष निवास शेळके आणि रमेश भोसले यांनी केला.