Bihar floods : बिहारमधील 14 जिल्ह्यांमध्ये पुराची स्थिती गंभीर असून, 43 लाख 64 हजारांहून अधिक नागरिक प्रभावित झाले आहेत. राज्यातील अनेक नद्या अद्याप धोक्याच्या पातळीच्या वरून वाहत आहेत. नेपाळमधील जलसंधारण क्षेत्रात झालेला मुसळधार पाऊस आणि बिहारमधील सातत्याने सुरू असलेल्या पावसामुळे नद्यांच्या पाणीपातळीत वाढ झाली आहे.

आपत्ती व्यवस्थापन विभागाच्या माहितीनुसार, पटणा, भोजपूर, सारण, वैशाली, भागलपूर, बेगूसराय, बक्सर, समस्तीपूर, मुंगेर, कटिहार, लखीसराय, खगडिया, पूर्णिया आणि अररिया या 14 जिल्ह्यांतील 85 प्रखंडांमधील 527 ग्रामपंचायतींना पुराचा फटका बसला आहे.

हवामान विभागाच्या माहितीनुसार, सप्टेंबरमध्ये आतापर्यंत बिहारमध्ये 83.6 मिलिमीटर पाऊस झाला आहे. हा पाऊस सरासरीपेक्षा 24 टक्के अधिक आहे. गुरुवारी सकाळी सहा वाजता भागलपूरच्या सुलतानगंज येथे गंगा नदीची पाणीपातळी 36.72 मीटर नोंदवण्यात आली. ती धोक्याच्या पातळीपेक्षा 2.22 मीटर अधिक असून सध्या स्थिर आहे.

गंडक, कोसी, बूढी गंडक, गंगा, पुनपुन, बागमती आणि घाघरा या नद्याही अनेक ठिकाणी धोक्याच्या पातळीच्या वरून वाहत आहेत.

पूरग्रस्तांसाठी विविध जिल्ह्यांत 951 सामुदायिक स्वयंपाकगृहे सुरू करण्यात आली आहेत. तसेच 15 मदत छावण्यांमध्ये 11 हजार 255 नागरिकांना निवारा, अन्न आणि वैद्यकीय सुविधांसह अन्य मदत दिली जात आहे.

आतापर्यंत पूरग्रस्तांना 2.57 लाख पॉलिथिन पत्रे आणि 40 हजार 600 कोरड्या धान्याची पाकिटे वितरित करण्यात आली आहेत. मदत व बचावकार्यासाठी 1,932 बोटी तैनात करण्यात आल्या असून, जनावरांसाठी 6,692 क्विंटल चारा वितरित करण्यात आला आहे.

गंडक बॅरेजमधून 77,600 क्युसेक, कोसी बॅरेजमधून 1,40,240 क्युसेक आणि इंद्रपुरी बॅरेजमधून 72,095 क्युसेक पाण्याचा विसर्ग गुरुवारी सकाळी नोंदवण्यात आला. तिन्ही ठिकाणी पाण्याचा प्रवाह स्थिर आहे.

बचाव आणि मदतकार्य अधिक वेगाने करण्यासाठी राज्यातील विविध जिल्ह्यांत एसडीआरएफच्या 27 आणि एनडीआरएफच्या 10 पथकांची तैनाती करण्यात आली आहे. पुढील दोन दिवसांत काही ठिकाणी हलका ते मध्यम, तर एक-दोन ठिकाणी मुसळधार पाऊस होण्याचा अंदाज हवामान विभागाने व्यक्त केला आहे.