Bihar Election 2025: बिहार विधानसभा निवडणुकीच्या तयारीला वेग आला आहे. मुख्य निवडणूक आयुक्त (सीईसी) ज्ञानेश कुमार यांनी आज निवडणूक पर्यवेक्षकांसोबत महत्त्वाची बैठक घेतली. दिल्लीतील द्वारका येथील इंडिया इंटरनेशनल इन्स्टिट्यूट फॉर डेमोक्रसी अँड इलेक्शन मॅनेजमेंट (IIDEM) संस्थेत झालेल्या या बैठकीत सीईसी आणि आयोगाच्या वरिष्ठ अधिकाऱ्यांनी पर्यवेक्षकांना पारदर्शक आणि निष्पक्ष निवडणुकीसाठी महत्त्वपूर्ण सूचना दिल्या. बिहारसह इतर राज्यांतील पोटनिवडणुकांनाही हे निर्देश लागू होणार असल्याचे स्पष्ट करण्यात आले.

मतगणना केंद्रांवर कडक सुरक्षा, फक्त अधिकृत व्यक्तींनाच प्रवेश –

बैठकीत मतगणना केंद्रांच्या सुरक्षेवर विशेष भर देण्यात आला. केंद्रांमध्ये आत-बाहेर जाणाऱ्यांवर कडक नजर ठेवण्यासाठी सख्त व्यवस्था करण्याचे निर्देश देण्यात आले. फक्त अधिकृत व्यक्तींनाच प्रवेश दिला जाणार असून, कोणत्याही अनधिकृत व्यक्तीला आत जाण्याची परवानगी नसल्याचे आयोगाने ठणकावून सांगितले. याशिवाय, सर्व केंद्रांवर सीसीटीव्ही कॅमेर्‍यांद्वारे सतत निरीक्षण करण्याची जबाबदारी पर्यवेक्षकांवर सोपवण्यात आली आहे. माध्यम प्रतिनिधींसाठी निर्धारित मानकांनुसार प्रवेशाची व्यवस्था करण्यावरही चर्चा झाली.

जनविश्वास कायम ठेवण्याचे आवाहन –

सीईसी कुमार यांनी पर्यवेक्षकांना मतदान आणि मतगणना प्रक्रियेवर कडक लक्ष ठेवण्याचे आणि कोणत्याही अनियमिततेची तात्काळ माहिती देण्याचे आदेश दिले. “कोणतीही अनियमितता आढळल्यास दोन मिनिटांत सूचना द्या,” असे त्यांनी स्पष्टपणे सांगितले. मतगणना दरम्यान उद्भवणाऱ्या तक्रारी किंवा वादग्रस्त मुद्द्यांचा तात्काळ आणि निष्पक्ष निपटारा करण्याचे निर्देशही दिले गेले. लोकशाही प्रक्रियेची विश्वासार्हता टिकवण्यासाठी पर्यवेक्षकांची जबाबदारी वाढवण्यात आली असून, जनतेच्या विश्वासाला धक्का लागू नये यासाठी प्रत्येक पायरीवर सतर्कता बाळगण्याचे आवाहन करण्यात आले.

लवकरच निवडणूक कार्यक्रम जाहीर –

या बैठकीनंतर मुख्य निवडणूक आयुक्तांच्या नेतृत्वाखालील आयोगाची टीम उद्या (४ ऑक्टोबर) पासून दोन दिवसांसाठी बिहारच्या दौऱ्यावर जाणार आहे. तेथे निवडणूक प्रक्रियेच्या अंतिम टप्प्यातील तयारीचा आढावा घेतला जाईल. निवडणूक कार्यक्रमाची घोषणा या दौऱ्यानंतरच होण्याची शक्यता आहे आणि ऑक्टोबरच्या दुसऱ्या आठवड्यात बिहार विधानसभा निवडणुकीचा वेळापत्रक जाहीर होण्याची अपेक्षा आहे.

बिहारमधील २४३ जागांसाठी होणाऱ्या या निवडणुकीत राजकीय पक्षांनी तयारी सुरू केली असली तरी आयोगाने पारदर्शकता आणि निष्पक्षतेवर भर देण्याचे ठरवले आहे. या निर्देशांमुळे निवडणूक प्रक्रिया अधिक मजबूत होईल, असे मत आयोगातील अधिकाऱ्यांनी व्यक्त केले.