पाटणा : माजी केंद्रीय मंत्री आणि भाजपचे नेते आर.के.सिंह यांनी कलंकित उमेदवारांना मतदान न करण्याचे आवाहन बिहारमधील जनतेला केले. कलंकित उमेदवारांची नावे घेताना त्यांनी उपमुख्यमंत्री आणि भाजपचे नेते सम्राट चौधरी यांचाही उल्लेख केला. सिंह यांची ती कृती स्वपक्षाचीच कोंडी करणारी ठरली आहे. परखड भूमिका मांडण्यासाठी ओळखल्या जाणाऱ्या सिंह यांनी याआधी केलेली काही वक्तव्ये भाजपलाच अडचणीत आणणारी ठरली होती. ते सत्र सिंह यांनी कायम ठेवले.

गुन्हेगारी आणि कलंकित पार्श्‍वभूमी असणाऱ्या उमेदवारांना बिहारी जनतेने मतदान करू नये. प्रसंगी वरील पैकी कुणी नाही (नोटा) या पर्यायाला पसंती द्यावी, असे आवाहन त्यांनी केले. कलंकित पार्श्‍वभूमी असणाऱ्या विविध पक्षांच्या उमेदवारांची नावे त्यांनी अधोरेखित केली. त्यामध्ये चौधरी यांच्या नावाचा समावेश चर्चेचा विषय बनला आहे.

सिंह हे भारतीय प्रशासकीय सेवेतील (आयएएस) निवृत्त अधिकारी आहेत. ते बिहारच्या आरा मतदारसंघातून दोनवेळा लोकसभेवर निवडून गेले. मात्र, मागील वर्षीच्या लोकसभा निवडणुकीत त्यांना पराभव पत्करावा लागला. त्यासाठी काही स्वपक्षीय नेते जबाबदार असल्याचा आरोप करत त्यांनी अलिकडेच नाराजी उघड केली होती.