Bihar Assembly Election 2025:  दारूबंदी लागू असलेल्या बिहारमध्ये आगामी विधानसभा निवडणुकीच्या पार्श्वभूमीवर निवडणूक आयोगाने मोठी कारवाई करत ७१ कोटींहून अधिक रुपयांची रोकड, दारू, अंमली पदार्थ आणि मौल्यवान वस्तू जप्त केल्या आहेत.

मतदान ६ व ११ नोव्हेंबरला:

निवडणूक आयोगाने ६ ऑक्टोबर रोजी बिहारमधील विधानसभा निवडणुकीची घोषणा केली होती. त्यानुसार, राज्यात ६ आणि ११ नोव्हेंबर अशा दोन टप्प्यांत मतदान होणार असून मतमोजणी १४ नोव्हेंबरला होईल. आयोगाने दिलेल्या माहितीनुसार, २१ ऑक्टोबरपर्यंत विविध राज्यांमध्ये आणि केंद्रशासित प्रदेशांमध्ये तपास यंत्रणांच्या समन्वित कारवाईद्वारे ७१.३२ कोटी रुपयांहून अधिक किमतीची रोकड, दारू, अंमली पदार्थ, मौल्यवान धातू आणि इतर भेटवस्तू जप्त करण्यात आल्या आहेत.

८२४ ‘फ्लाइंग स्क्वॉड’ तैनात:

निवडणुकीदरम्यान आचारसंहितेचे उल्लंघन आणि तक्रारींचा तातडीने निपटारा करण्यासाठी निवडणूक आयोगाने संपूर्ण बिहारमध्ये ८२४ ‘फ्लाइंग स्क्वॉड’ (उड्डाण पथके) तैनात केली आहेत. या पथकांद्वारे १०० मिनिटांत तक्रारींचे निवारण सुनिश्चित केले जाईल. नागरिक आणि राजकीय पक्ष ‘सी-विजिल’ मोबाईल ॲप्लिकेशन किंवा ‘ईसीआयनेट’ डिजिटल प्लॅटफॉर्मचा वापर करून आचारसंहिता उल्लंघनाची तक्रार करू शकतात.

पहिला टप्पा: १२१ जागांसाठी १,३१४ उमेदवार:

दरम्यान, बिहार विधानसभा निवडणुकीच्या पहिल्या टप्प्यासाठी उमेदवारी अर्ज मागे घेण्याची प्रक्रिया सोमवारी (२० ऑक्टोबर) पूर्ण झाली. मुख्य निवडणूक अधिकाऱ्यांच्या कार्यालयाने दिलेल्या माहितीनुसार, आता राज्यातील १८ जिल्ह्यांमध्ये असलेल्या १२१ विधानसभा जागांसाठी एकूण १,३१४ उमेदवार निवडणूक रिंगणात उतरले आहेत.

नामनिर्देशन प्रक्रिया:

पहिल्या टप्प्यासाठी नामनिर्देशन प्रक्रिया १० ऑक्टोबर ते १७ ऑक्टोबरपर्यंत चालली. १८ ऑक्टोबरला अर्जांची छाननी झाली आणि २० ऑक्टोबरपर्यंत उमेदवारांना अर्ज मागे घेता आले. एकूण १,६९० उमेदवारांनी अर्ज दाखल केले होते, त्यापैकी १,३७५ अर्ज वैध ठरले. अर्ज मागे घेण्याच्या शेवटच्या दिवसापर्यंत ६१ उमेदवारांनी माघार घेतल्यामुळे आता १,३१४ उमेदवार निवडणुकीत आपले नशीब आजमावत आहेत. पहिल्या टप्प्यासाठी मतदान ६ नोव्हेंबर रोजी होणार आहे.