प्रभात वृत्तसेवा पुणे – एका बाजूला कर्करोगाच्या रुग्णांची संख्या लक्षणीय प्रमाणात वाढत असतानाच, दुसरीकडे या आजाराच्या गांभीर्याच्या निदानासाठी आवश्यक असलेली पेट स्कॅन ही तपासणी सर्वसामान्य रुग्णांना परवडणारी नाही, तसेच शहरातील कोणत्याही महापालिकेच्या तसेच शासकीय रुग्णालयातही याची सुविधा नाही. मात्र, आता महापालिकेकडून या सुविधेसाठी पुढाकार घेण्यात आला असून, महानगरपालिकेकडून देशातील पहिली पीपीपी तत्त्वावरील पेट स्कॅन व रेडिओ डायग्नोस्टिक लॅब सुरू केली जाणार आहे. त्यामुळे खासगी वैद्यकीय लॅबमध्ये सुमारे २५ ते ३० हजार रुपये शुल्क आकारले जाणारी ही तपासणी आता सर्वसामान्य पुणेकरांना महापालिकेच्या या लॅबमध्ये अवघ्या १२ हजार रुपयांमध्ये उपलब्ध होणार आहे. तर महापालिकेच्या शहरी गरीब योजनेचे सभासद असलेल्या रुग्णांसाठी ती मोफत असणार असून, त्याचा खर्च महापालिका करणार आहे.महापालिका आयुक्त नवल किशोर राम यांनी नुकताच या लॅबच्या कामाचा आढावा घेत नियोजित वेळेत ती सुरू करण्याच्या सूचना दिल्या आहेत. त्यानुसार, डिसेंबर २०२५ अखेरपर्यंत ही सुविधा सुरू करण्याचे नियोजन महापालिकेच्या आरोग्य विभागाकडून करण्यात आले आहे. महापालिकेच्या आरोग्य अधिकारी डॉ. निना बोराडे, सहाय्यक आरोग्य अधिकारी डॉ. संजीव वावरे यावेळी उपस्थित होते. महापालिकेकडून स्वारगेट येथील हिराबाग आरोग्य कोठी शेजारील स्व. वसंतदादा पाटील प्रशिक्षण केंद्राच्या इमारतीत ही लॅब सुरू केली जाणार आहे. १६ कोटींचा खर्च.. सध्या कर्करोगाचे रुग्ण वाढत्या संख्येने आढळत आहेत. या आजारावरील उपचाराचा खर्च अधिक असल्याने सर्वसामान्य नागरिकांच्या अवाक्याबाहेर हा खर्च गेला आहे. त्यामुळे महापालिकेकडून शहरी गरीब योजनेअंतर्गत या रुग्णांना प्रत्येक वर्षासाठी २ लाखांपर्यंतच्या उपचाराचे अर्थसाहाय्य दिले जाते. मात्र, हा आजार शरीरात किती पसरला आहे याची तपासणी घेण्यासाठी आवश्यक असलेली पेट स्कॅन सुविधा महाग असून, ती सर्वसामान्यांना परवडत नाही. त्यामुळे महापालिकेकडून ही लॅब सुरू करण्यात येणार आहे. मागील चार महिन्यांपासून हे काम सुरू असून, या प्रकल्पासाठी सुमारे १६ कोटींचा खर्च महापालिकेकडून करण्यात आला आहे. या ठिकाणी पेट स्कॅन, एमआरआय, सीटी स्कॅन, पॅथॉलॉजी आणि बायोकेमिस्ट्री लॅब यांसह सर्व सुविधा सीजीएचएस दरांमध्ये गरीब व गरजू रुग्णांना मिळणार आहेत. त्यामुळे सर्वसामान्यांना मोठा दिलासा मिळणार आहे.
