आज चॅम्पियन्स ट्रॉफीमध्ये इंग्लंड विरूद्ध अफगाणिस्तान यांच्यात सामना खेळवला जात आहे. हा सामना दोन्ही संघांसाठी महत्वपूर्ण आहे. या सामन्यात ज्या संघाचा पराभव होईल त्या संघाला स्पर्धेतून बाहेर पडावे लागेल. एकीकडे इंग्लंड आणि अफगाणिस्तान यांच्यात करो या मरोचा सामना सुरु असताना दुसरीकडे ऑस्ट्रेलियाच्या संघाला मोठा धक्का बसला आहे.

‘या’ खेळाडूने घेतली तडकाफडकी निवृत्ती
ऑस्ट्रेलियाचा डावखुरा वेगवान गोलंदाज जेसन बेहरेनडॉर्फने आज अचानक तडकाफडकी निवृत्ती जाहीर केली आहे. पश्चिम ऑस्ट्रेलियामध्ये 16 वर्षे घालवल्यानंतर त्याने राज्य क्रिकेटमधून निवृत्तीची घोषणा केली आहे. जेसन हा जगभरातील टी20 लीगमध्ये खेळत राहील. याशिवाय, बेहरेनडॉर्फ ऑस्ट्रेलियन संघासाठी देखील उपलब्ध असेल. त्याने आतापर्यंत ऑस्ट्रेलिया संघासाठी 17 टी-20 आणि 12 एकदिवसीय सामने खेळले आहेत.

जेसन बेहरेनडॉर्फची प्रतिक्रिया
‘खरोखरच रोमांचक असलेल्या एका अध्यायाचा शेवट झाला आहे. हे खूप मजेदार होते. मी राज्य क्रिकेट खेळण्याचे आणि नंतर ऑस्ट्रेलियासाठी क्रिकेट खेळण्याचे माझे बालपणीचे स्वप्न जगू शकलो अशी प्रतिक्रिया जेसन बेहरेनडॉर्फने निवृत्तीनंतर दिली आहे.

जेसन बेहरेनडॉर्फची कारकीर्द
जेसन बेहरेनडॉर्फ १९ व्या वर्षी वेस्टर्न ऑस्ट्रेलियामध्ये सामील झाला आणि लवकरच सर्व फॉरमॅटमध्ये त्यांच्या गोलंदाजी हल्ल्याचा एक महत्त्वाचा भाग बनला. बेहरेनडॉर्फने संघासोबत पाच एकदिवसीय चषक जिंकले आणि चालू हंगामाच्या सुरुवातीला राज्यासाठी त्याचा शेवटचा लिस्ट ए सामना खेळला.बेहरेनडॉर्फने 2017-18 च्या हंगामात सततच्या दुखापतींमुळे त्याची रेड बॉल कारकीर्द सोडली.त्याने 31 प्रथम श्रेणी सामन्यांमध्ये 23.85 च्या सरासरीने 126 विकेट्स घेतल्या आहेत.