भवानीनगर: श्री छत्रपती सहकारी साखर कारखान्याच्या ऊस गळीत हंगामाला सुरुवात झाली असून, कारखान्याचे अध्यक्ष पृथ्वीराज जाचक, उपाध्यक्ष कैलास गावडे आणि सर्व संचालक मंडळाने ऊस उत्पादक सभासदांच्या अपेक्षा पूर्ण करत यंदाच्या गाळपासाठी प्रति टन ३१०१ रुपये इतका पहिला हप्ता जाहीर करून मोठा दिलासा दिला आहे. यंदाच्या हंगामात कारखान्याने ऊस उत्पादक सभासदांना दिलेला हा दर अपेक्षेपेक्षा जास्त असल्याने सभासदांमध्ये उत्साहाचे वातावरण आहे. विशेष म्हणजे, जाहीर केलेल्या दरात सोसायटी किंवा इतर कोणत्याही प्रकारची कपात केली जाणार नसल्याचे अध्यक्ष जाचक यांनी स्पष्ट केले. याचबरोबर, जानेवारी महिन्यात तुटणाऱ्या खोडवा उसाला प्रति टन १०० रुपये अनुदान दिले जाणार आहे, तर गेटकेन ऊसाला देखील सभासदांप्रमाणेच ३१०१ रुपये प्रति टन दर मिळणार आहे. कारखान्याने या हंगामासाठी १२ लाख टन ऊस गाळपाचे उद्दिष्ट ठेवले आहे. हे उद्दिष्ट पूर्ण करण्यासाठी कार्यक्षेत्रातील सर्व ऊस उत्पादक सभासदांनी आपला संपूर्ण ऊस श्री छत्रपती सहकारी साखर कारखान्यातच गाळपासाठी देऊन सहकार्य करावे, अशी विनंती अध्यक्ष, उपाध्यक्ष आणि संचालक मंडळाने यावेळी केली आहे.
