Ambadas Danve : छत्रपती संभाजीनगर जिल्हा बँक निवडणुकीत मोठी राजकीय घडामोड समोर आली आहे. शिवसेना (उद्धव बाळासाहेब ठाकरे गट) चे नेते आणि आमदार अंबादास दानवे यांनी मोठा निर्णय घेतला.

जिल्हा बँक निवडणुकीत त्यांनी थेट महायुतीसोबत संधान बांधल्याचे स्पष्ट झाले आहे. महाविकास आघाडी आणि महायुती अशी दोन स्वतंत्र पॅनल रिंगणात असतानाही दानवे यांनी महायुतीच्या पॅनलमध्ये सहभागी होण्याचा निर्णय घेतल्याने राजकीय वर्तुळात खळबळ उडाली आहे.  (Ambadas Danve)

या निवडणुकीत आतापर्यंत ८ उमेदवार बिनविरोध संचालक झाले असून उर्वरित १२ जागांसाठी थेट लढत होणार आहे. बिनविरोध निवडीचा प्रयत्न अपयशी ठरल्यानंतर महायुती आणि महाविकास आघाडी अशी दोन गटांत विभागणी झाली. मात्र, ठाकरे गटाचे नेते अंबादास दानवे यांनी मविआऐवजी महायुतीच्या पॅनलमधून निवडणूक लढवण्याचा निर्णय घेतल्याने अनेकांकडून आश्चर्य व्यक्त केले जात आहे.

 

या निर्णयावर प्रतिक्रिया देताना अंबादास दानवे यांनी ही बँक निवडणूक असल्याने त्यात थेट पक्षीय राजकारण नसते, अशी भूमिका मांडली आहे. मात्र, चार दिवसांपूर्वीच ठाकरे गटातील खासदारांनी शिंदे गटात प्रवेश केल्यानंतर या घडामोडीकडे वेगळ्या दृष्टिकोनातून पाहिले जात आहे. दानवे यांच्या या भूमिकेमुळे जिल्हा बँक निवडणूक राज्यातील राजकीय चर्चेचा केंद्रबिंदू ठरली आहे.   (Ambadas Danve)

हेही वाचा : Share Market Today: शेअर बाजारात तेजी! सेन्सेक्स जवळपास ४०० अंकांनी वधारला ; निफ्टीनेही २४,००० चा टप्पा ओलांडला

दरम्यान, छत्रपती संभाजीनगर जिल्हा बँकेच्या २१ संचालकपदांसाठी एकूण १२० उमेदवारांनी अर्ज दाखल केले होते. त्यापैकी ८३ उमेदवारांनी माघार घेतल्याने आणि एक अर्ज छाननीत अवैध ठरल्याने 20 जागांसाठीच निवडणूक होत आहे. यापैकी 8 जागा बिनविरोध झाल्या असून, उर्वरित १२ जागांसाठी ३१ उमेदवार रिंगणात आहेत. या जिल्हा बँक निवडणुकीकडे जिल्ह्याचे लक्ष लागले आहे. या निवडणुकीत मंत्री अतुल सावे, कल्याण काळे, अनुराधा चव्हाण, अंबादास दानवे यांच्यासह अनेक दिग्गज उमेदवारांची प्रतिष्ठा पणाला लागली आहे.