DGP Sadanand Date: महाराष्ट्र सरकारने राज्य पोलीस दलाच्या सर्वोच्च पदी ज्येष्ठ आयपीएस अधिकारी आणि एनआयएचे माजी प्रमुख सदानंद दाते यांची नियुक्ती केली आहे. या संदर्भातील अधिकृत आदेश राज्य सरकारकडून जारी करण्यात आला असून विद्यमान पोलीस महासंचालक रश्मी शुक्ला यांचा कार्यकाळ ३१ डिसेंबर रोजी संपत असल्याने त्यांच्या जागी आता दाते राज्याच्या पोलीस दलाची धुरा सांभाळतील. १९९० च्या बॅचचे आयपीएस अधिकारी असलेल्या सदानंद दाते यांना केंद्र सरकारने नुकतीच त्यांच्या मूळ केडरमध्ये (महाराष्ट्र) परतण्याची परवानगी दिली होती, त्यानंतर राज्य सरकारने हा महत्त्वाचा निर्णय घेतला आहे. सदानंद दाते यांची ओळख एक शिस्तप्रिय आणि धाडसी अधिकारी म्हणून आहे. २००८ च्या मुंबई दहशतवादी हल्ल्यादरम्यान कामा रुग्णालयात त्यांनी अजमल कसाब आणि त्याच्या साथीदारांशी निकराने झुंज दिली होती. या चकमकीत ते गंभीर जखमी झाले होते, मात्र त्यांनी दाखवलेल्या अतुलनीय शौर्यामुळे ते खऱ्या अर्थाने नायक ठरले. त्यांच्या या साहसाबद्दल त्यांना राष्ट्रपती पोलीस पदकाने सन्मानित करण्यात आले आहे. या नियुक्तीमुळे राज्याला एक अनुभवी आणि कार्यक्षम नेतृत्व मिळाले असल्याची भावना व्यक्त होत आहे. दाते यांचा प्रशासकीय अनुभव दांडगा असून त्यांनी महाराष्ट्रासह केंद्र सरकारमध्येही अनेक महत्त्वाची पदे भूषवली आहेत. एनआयएचे प्रमुख होण्यापूर्वी त्यांनी महाराष्ट्र दहशतवाद विरोधी पथकाचे (एटीएस) नेतृत्व केले आहे. तसेच मीरा-भाईंदर वसई-विरारचे पोलीस आयुक्त, मुंबईचे संयुक्त पोलीस आयुक्त (गुन्हे) आणि कायदा व सुव्यवस्था यांसारख्या जबाबदाऱ्या त्यांनी यशस्वीपणे पार पाडल्या आहेत. याशिवाय सीबीआय आणि सीआरपीएफमध्येही त्यांनी वरिष्ठ पदांवर काम केले आहे. सर्वोच्च न्यायालयाच्या निर्देशानुसार पोलीस महासंचालक पदाचा कार्यकाळ किमान दोन वर्षांचा असणे आवश्यक आहे. रश्मी शुक्ला यांना यापूर्वी मुदतवाढ देण्यात आली होती, मात्र आता सदानंद दाते यांच्या नियुक्तीनंतर त्यांचा कार्यकाळ २०२७ च्या अखेरपर्यंत असणार आहे. त्यांच्या नियुक्तीमुळे राज्यातील कायदा आणि सुव्यवस्था अधिक मजबूत होईल, अशी अपेक्षा प्रशासकीय वर्तुळातून व्यक्त केली जात आहे.
