Purandar Airport Update : पुणे जिल्ह्यातील पुरंदर विमानतळासंदर्भात एक मोठी अपडेट समोर आली आहे. गेल्या आठवड्यात मुख्यमंत्री देवेंद्र फडणवीस यांच्या उपस्थितीत झालेल्या बैठकीत शेतकऱ्यांकडून जमीनीचे भूसंपादन करताना त्यांना दिला जाणारा मोबदला अर्थात पॅकेज जाहीर करण्यात आले होते. आता जिल्हाधिकारी कार्यालयाने जाहीर केल्यानुसार ‘प्रथम येणाऱ्यास प्राधान्य’ अशा स्वरूपात मोबदला आणि विकसित भूखंड दिला जाणार आहे. राज्य सरकारने पुरंदर विमानतळाच्या भूसंपादनासाठी पॅकेज जाहीर करताच स्थानिक १०० शेतकऱ्यांनी जागा देण्यास संमती दिली आहे. यामुळे आता विमानतळाच्या कामाला गती मिळणार आहे. तसेच मुख्यमंत्र्यांनी या बैठकीत संपादनाची प्रक्रिया तातडीने सुरू करा, असे निर्देश जिल्हाधिकाऱ्यांना दिले आहेत. येत्या काही दिवसांमध्ये कुंभारवळण, एखतपूर, उदाची वाडी, मुंजवडी, खानवडी, पारगाव मेमाणे, वनपुरी या २६७३ हेक्टर जमीन संपादित करण्यात येणार आहे. विमानतळासाठी जमीन देण्यासाठी इच्छुक शेतकऱ्यांकडून संमतीपत्रे भरून घेण्याची प्रक्रिया जिल्हाधिकारी कार्यालय आणि सासवड येथील उपविभागीय अधिकारी कार्यालयात सुरू झाली आहे. प्रथम येणाऱ्यास प्राधान्य सात गावांतील १०० जणांनी समंतीपत्रे दिल्याने त्यातून १२५ एकर जमीन संपादित करण्याची प्रक्रिया पुढे सरकणार असल्याचे दिसत आहे. विमानतळानजीकच्या प्रस्तावित एरोसिटीत १० टक्के परताव्यासाठी २६८ हेक्टर अर्थात ६७० एकर जमीन राखीव ठेवण्याचा निर्णय घेण्यात आला आहे. भूसंपादनाची प्रक्रिया राबविताना प्रथम येणाऱ्यास प्राधान्य या तत्त्वावर भूखंडांचे वाटप केले जाणार आहे. तसेच भूखंडांचे वाटप कशा पद्धतीने करायचे, औद्योगिक, वाणिज्यिक, निवासी प्रयोजनासाठी करताना संबंधित जमीनमालकांना कोणत्या ठिकाणी जमीन द्यायची याबाबतचा निर्णय महाराष्ट्र राज्य औद्योगिक विकास महामंडळ अर्थात एमआयडीसी घेणार आहे. भूसंपादन कायदा आणि महाराष्ट्र राज्य औद्योगिक विकास महामंडळ पुनर्वसन कायदा २०१९ नुसार चौपट मोबदला दिला जाणार आहे. तर एकूण संपादित जमिनीच्या १० टक्के विकसित जमीन शेतकऱ्यांना परत मिळणार आहे. यामुळे आता किती जण संमती पत्रे भरून देणार हे पाहणे महत्वाचे असणार आहे.
