Sanjay Patil : आगामी स्थानिक स्वराज्य संस्थांच्या निवडणुकांच्या अनुषंगाने इन्कमिंग अन् आऊटगोईंग सुरूच आहे. अशातच पश्चिम महाराष्ट्रातून एक मोठी बातमी समोर आली आहे. राष्ट्रवादी काँग्रेस पक्षाचे माजी खासदार अजित पवार यांची साथ सोडणार असल्याची चर्चा होत आहे. तशा पद्धतीचे संकेत सांगलीचे राष्ट्रवादी काँग्रेस पक्षाचे माजी खासदार संजय काका पाटील यांनी दिले आहेत. “कार्यकर्ता हाच माझा पक्ष आणि येणाऱ्या जिल्हा परिषद, नगरपालिका नगरपरिषद, महापालिका निवडणुकीत विकास महाआघाडी तर्फे निवडणूक लढवणार. जिह्यातील अनेक नेते संपर्कात असून आठ दिवसांत भूमिका स्पष्ट करणार”. असल्याचे माजी खासदार संजय काका पाटील म्हणाले आहेत. यामुळे येत्या काही दिवसांमध्ये अजित पवार यांच्या राष्ट्रवादी काँग्रेस पक्षाला धक्का बसणार असल्याची चर्चा राजकीय वर्तुळात होत आहे. सांगलीचे माजी खासदार संजय काका पाटील यांनी राष्ट्रवादी काँग्रेस पक्ष अजित पवार यांच्या घड्याळ या चिन्हावर लोकसभेची निवडणूक लढली होती. नेमकं काय म्हणाले संजय काका पाटील? ज्यांच्यामुळे आमदार, खासदार झालो, त्या कार्यकर्त्यांशी कधीही प्रतारणा करणार नाही. सत्तेत असताना नीती, न्यायाने वागलो, भ्रष्टाचार अन्याय यापासून दूर राहिलो. सामंजस्याची भूमिका घेतली. याचा अर्थ मी कमी आहे, असे नाही. कार्यकर्ते हीच माझी संपत्ती आहे. स्थानिक स्वराज्य संस्थांच्या निवडणुका या कार्यकर्त्यांच्या असतात. कार्यकर्त्यांसाठी, त्यांच्या निवडणुकांसाठी निवडणुकीपेक्षा अधिक ताकदीने त्यांच्या खांद्याला खांदा लावून लढणार आहे. असे विधान संजय काका पाटील यांनी तासगाव कंवठेमहांकाळ तालुक्यातील कार्यकर्त्यांच्या संवाद बैठकीतून केले आहे. विशेष म्हणजे या मेळाव्याच्या ठिकाणी कोणत्याही पक्षाचा झेंडा अथवा कोणत्याही पक्षाच्या नेत्याचे छायाचित्र नव्हते. त्यामुळे चर्चांना उधान आले आहे. त्यामुळे आगामी काही दिवसांत संजय काका पाटील कोणता निर्णय घेणार हे पाहणे महत्वाचे असणार आहे. संजय काका पाटील यांचे आवाहन जिल्ह्याच्या राजकारणात कोणाचा ताळमेळ कोणाला नाही. कोण काय बोलतोय, याचे कोणालाच भान नाही. माझी घुसमट होत आहे. त्यामुळे कार्यकर्ता हाच माझ्यासाठी पक्ष आहे. ही लढाई पूर्ण ताकतीने लढू या, असे आवाहन संजय काका पाटील यांनी कार्यकर्त्यांना केले. हेही वाचा : “सत्तेत असताना तुम्हाला पीडीएची आठवण का आली नाही?” ; मायावतींची सपा अन् काँग्रेसवर टीका
