प्रभात वृत्तसेवा पुणे – राज्यात नगरपालिका, नगरपरिषद आणि नगरपंचायतींच्या निवडणुका २ डिसेंबर रोजी होत आहे. त्या पार्श्वभूमीवर महाराष्ट्र राज्य तंत्र शिक्षण मंडळाने (एमएसबीटीई) तंत्रशिक्षण अभ्यासक्रम अर्थात पॉलिटेक्निक अभ्यासक्रमाच्या लेखी परीक्षांच्या वेळापत्रकात बदल केला आहे. त्यामुळे १ व २ डिसेंबर रोजी होणाऱ्या परीक्षा आता ४ आणि ५ डिसेंबरला होणार आहेत. निवडणुकांसाठी शैक्षणिक संस्थांच्या इमारती व वर्ग खोल्या सरकारने ताब्यात घेतल्या आहेत. निवडणुकीच्या आधीचा दिवस, प्रत्यक्ष मतदान आणि त्यापुढील एक दिवस या तीन दिवसांत परीक्षा घेणे शक्य होणार नाही. यापूर्वी पॉलिटेक्निकची परीक्षा १ आणि २ डिसेंबर रोजी घेण्याचे निश्चित केले होते. मात्र, आता ही परीक्षा पुढे ढकलण्याचा निर्णय घेण्यात आला आहे. सुधारित वेळापत्रकानुसार १ डिसेंबर रोजी होणारी परीक्षा ४ डिसेंबरला, तर २ डिसेंबरला होणारी परीक्षा ५ डिसेंबरला होईल. त्यानुसार नियोजन करावे, असे आवाहन एमएसबीटीईचे सचिव उमेश नागदेवे यांनी केले आहे. हा बदल मुंबईसह पुणे, नागपूर आणि छत्रपती संभाजीनगर या विभागीय कार्यक्षेत्रात लागू होणार असल्याचे ते म्हणाले.
