Tiger Shroff attack : बॉलिवूड अभिनेता टायगर श्रॉफच्या कारवर गोळीबार झाल्याच्या घटनेने मनोरंजनविश्वात मोठी खळबळ उडाली आहे. या घटनेमुळे चित्रपटसृष्टीतील कलाकारांच्या सुरक्षेचा प्रश्न पुन्हा एकदा ऐरणीवर आला आहे.

या पार्श्वभूमीवर मुंबई पोलिसांनी सतर्कता वाढवली असून, अनेक बॉलिवूड कलाकारांच्या सुरक्षेत आणखी वाढ करण्यात आल्याची बातमी समोर आली आहे.

मुंबईतील जुहू आणि वांद्रे परिसरात राहणाऱ्या काही सेलिब्रिटींच्या घरांबाहेरील सुरक्षा व्यवस्था अधिक कडक करण्यात आल्याचे वृत्त आहे. अक्षय कुमारसह अनेक कलाकारांनीही खबरदारी म्हणून स्वतःच्या सुरक्षेत वाढ केल्याची चर्चा आहे.

दिशा पटानीच्या कुटुंबाच्या सुरक्षेवर विशेष लक्ष

अभिनेत्री दिशा पटानीच्या घरावर ११ सप्टेंबर २०२५ रोजी अज्ञात व्यक्तींनी गोळीबार केल्याची घटना घडली होती. या पार्श्वभूमीवर तिच्या कुटुंबाच्या सुरक्षेबाबत विशेष खबरदारी घेतली जात आहे. उत्तर प्रदेशातील बरेली येथे असलेल्या तिच्या घराजवळील सुरक्षा व्यवस्थेचाही आढावा घेण्यात येत असल्याची माहिती आहे.

रोहित शेट्टीच्या सुरक्षेतही वाढ

प्रसिद्ध दिग्दर्शक रोहित शेट्टी याच्या जुहू येथील घराबाहेरही गोळीबाराची घटना घडली होती. या हल्ल्याची जबाबदारी बिश्नोई टोळीशी संबंधित व्यक्तींनी स्वीकारल्याचे वृत्त समोर आले होते.

आता टायगर श्रॉफवरील गोळीबाराच्या घटनेनंतर रोहित शेट्टीच्या सुरक्षेचा पुन्हा आढावा घेण्यात आल्याची माहिती आहे. संभाव्य धोका लक्षात घेऊन पोलिसांकडून खबरदारी घेतली जात आहे.

सलमान खानवर धमक्यांचे सावट

अभिनेता सलमान खानच्या सुरक्षेचा मुद्दाही पुन्हा चर्चेत आला आहे. २०२४ मध्ये मुंबईतील गॅलेक्सी अपार्टमेंटबाहेर दोन हल्लेखोरांनी गोळीबार केला होता. या घटनेनंतर सलमान खानच्या सुरक्षेत वाढ करण्यात आली होती. लॉरेन्स बिश्नोई टोळीशी संबंधित धमक्यांमुळे त्याच्या सुरक्षेबाबत सातत्याने खबरदारी घेतली जात आहे.

 टायगर श्रॉफसोबत नेमकं काय घडलं?

अभिनेता टायगर श्रॉफ फुटबॉल खेळून घरी परतत असताना जुहू येथील पुष्पा पार्कजवळ त्याच्या कारवर गोळीबार करण्यात आला. या घटनेत टायगर श्रॉफ थोडक्यात बचावला, तर त्याचा चालक फिरदौस आणि एका रिक्षाचालकाला दुखापत झाली होती.

पोलिसांनी या प्रकरणाचा तपास वेगाने सुरू केला असून, आतापर्यंत पाच आरोपींना अटक करून त्यांची चौकशी करण्यात आली आहे. चौकशीत या प्रकरणात अनेक धक्कादायक खुलासे समोर आले आहेत.

Cardamom Benefits: वजन कमी करण्यापासून पचन सुधारण्यापर्यंत! स्वयंपाकघरातील वेलचीचे आरोग्यदायी फायदे जाणून घ्या