नवी दिल्ली: नवीन वर्ष २०२६ च्या सुरुवातीलाच हुंदाई इंडियाने आपल्या ग्राहकांसाठी आनंदाची बातमी दिली आहे. कंपनीने आपल्या प्रवासी वाहनांच्या संपूर्ण रेंजवर धमाकेदार सवलती जाहीर केल्या असून यामध्ये ९८,००० रुपयांपर्यंतचा फायदा दिला जात आहे. या विशेष ऑफर्समध्ये रोख सवलत, एक्सचेंज बोनस, स्क्रॅपेज बोनस आणि कॉर्पोरेट ऑफर्सचा समावेश आहे. सवलतीची ही रक्कम मॉडेल, व्हेरियंट, इंधन प्रकार आणि शहरानुसार बदलू शकते. कंपनीची सर्वात लहान एसयूव्ही ‘हुंदाई एक्सटर’वर सर्वाधिक ९८,००० रुपयांची सूट मिळत आहे. या कारची किंमत ५.६४ लाख रुपयांपासून सुरू होते. त्याखालोखाल ‘हुंदाई i20’ या प्रीमियम हॅचबॅकवर ९५,००० रुपयांपर्यंतचा लाभ दिला जात आहे, तर i20 N-Line खरेदी करणाऱ्यांना ८७,००० रुपयांपर्यंत सवलत मिळेल. मारुती स्विफ्टला टक्कर देणाऱ्या ‘ग्रँड i10 निओस’वर ८९,००० रुपयांची सूट उपलब्ध आहे. सेडान श्रेणीमध्ये ‘हुंदाई वेरना’च्या टर्बो आणि नॉन-टर्बो पेट्रोल व्हेरियंटवर ७०,००० रुपयांपर्यंतचा फायदा मिळत आहे. तसेच सात आसनी ‘अल्काझार’ एसयूव्हीवर ६५,००० रुपयांपर्यंतची एकूण सूट जाहीर करण्यात आली आहे. लोकप्रिय एसयूव्ही ‘व्हेन्यू’च्या बाबतीत बोलायचे झाले तर, जुन्या स्टॉकवर ६०,००० रुपये आणि नवीन स्टॉकवर २५,००० रुपयांपर्यंत सवलत दिली जात आहे. हुंदाई ‘ऑरा’च्या सीएनजी व्हेरियंटवर ५८,००० रुपयांचा मोठा फायदा ग्राहकांना घेता येईल. सर्वात जास्त मागणी असलेल्या ‘हुंदाई क्रेटा’ आणि ‘क्रेटा एन-लाईन’वर देखील जानेवारी महिन्यात ४०,००० रुपयांपर्यंतचा डिस्काउंट दिला जात आहे. सध्या बाजारात क्रेटाची स्पर्धा मारुती ग्रँड विटारा, किया सेल्टोस आणि टाटा सिएरा यांसारख्या गाड्यांशी आहे. कार खरेदीदारांनी हे लक्षात ठेवावे की या सवलती स्टॉकच्या उपलब्धतेवर अवलंबून आहेत, त्यामुळे अचूक माहितीसाठी आपल्या जवळच्या अधिकृत डीलरशी संपर्क साधणे आवश्यक आहे.
