प्रभात वृत्तसेवा पुणे – अहिल्यानगरचे पालकमंत्री राधाकृष्ण विखे पाटील यांच्या निर्देशानंतर, जिल्हाधिकाऱ्यांनी अहिल्यानगरमधील ज्या गावांमध्ये अलिकडच्या काळात बिबट्या संघर्षाची नोंद झाली आहे, त्या गावांमध्ये शाळांच्या वेळा बदलण्याचे आदेश जारी केले आहेत.अहिल्यानगरमधील ६०० गावांमधील शाळांसाठी आदेश जारी करण्यात आला असून, त्याच्या अंमलबजावणीला १८ नोव्हेंबरपासून सुरुवात झाली आहे. याविषयी अहिल्यानगरचे जिल्हाधिकारी पंकज आशिया यांनी ही माहिती दिली. अहिल्यानगरमधील दिग्रस येथील जिल्हा परिषद शाळेत रविवारी (१६ नोव्हें.) झालेल्या एका कार्यक्रमात विखे पाटील यांनी जिल्हाधिकाऱ्यांना शाळेच्या वेळा बदलण्याची सूचना केली होती.ग्रामीण भागात बिबट्याच्या मानवावर आणि मानवी वस्तीतील पाळीव जनावरांवर हल्ल्याच्या घटना वाढल्या आहेत. ज्यामुळे रहिवाशांमध्ये, विशेषतः शाळकरी मुलांमध्ये भीती निर्माण झाली आहे. गावातील अनेक विद्यार्थी शाळेत पोहोचण्यासाठी २-३ किमी चालत जातात. या हंगामात लवकर अंधार पडल्याने मुलांना अनेकदा एकटे घरी परतावे लागते. ज्यामुळे बिबट्या हल्ल्याचा धोका वाढतो. गेल्या काही दिवसांपासून या परिस्थिती लक्षात घेता शाळांच्या वेळा बदलण्याची मागणी होत होती.त्यानुसार, जिल्ह्यातील ६०० गावांमधील शाळांच्या वेळा आता बदलण्यात आल्या आहेत. नवीन वेळापत्रकानुसार ग्रामीण भागातील शाळा पूर्वीच्या ५:३० ते सहा ऐवजी ४:३० वाजता संपतील, तसेच शाळा व्यवस्थापन समित्या आणि शिक्षकांना विशेष सूचना देण्यात आल्या आहेत. ज्यामध्ये त्यांनी मुलांना गटात किंवा पालकांसह घरी परतण्याची खात्री करण्याचे निर्देश दिले आहेत. शाळांना यासंदर्भात कडक खबरदारी घेण्यास सांगण्यात आल्याचे जिल्हाधिकाऱ्यांनी सांगितले.
