गांधीनगर : गुजरातचे मुख्यमंत्री भूपेंद्र पटेल यांच्या नेतृत्वाखालील मंत्रिमंडळाचा विस्तार दिवाळीपूर्वी होण्याची शक्यता आहे. याचा अर्थ असा की गुजरात मंत्रिमंडळात पुढील पाच दिवसांत फेरबदल होऊ शकतात, असे सत्ताधारी भारतीय जनता पक्षातील सूत्रांनी सांगितले. भाजपच्या एका वरिष्ठ नेत्याने मंगळवारी सांगितले की, मंत्रिमंडळ विस्तारात अंदाजे १० नवीन जणांना मंत्रिपदाची शपथ दिली जाण्याची शक्यता आहे. पीटीआयच्या वृत्तानुसार, नाव न छापण्याच्या अटीवर बोलताना, नेत्याने सांगितले की, आगामी मंत्रिमंडळ विस्तार आणि फेरबदलात सध्याच्या मंत्र्यांपैकी सुमारे निम्मे मंत्री बदलले जाण्याची शक्यता आहे. राज्य मंत्रिमंडळात सध्या १७ मंत्री आहेत, ज्यात मुख्यमंत्री भूपेंद्र पटेल यांचा समावेश आहे, त्यापैकी आठ कॅबिनेट दर्जाचे मंत्री आहेत. सध्याच्या मंत्रिमंडळातील सुमारे ५० टक्के मंत्र्यांची बदली होण्याची शक्यता आहे. मंत्रिमंडळ विस्तार किंवा फेरबदल १८ ऑक्टोबरपूर्वी होऊ शकतात. या विस्तारानंतर गुजरातला १० नवीन मंत्री मिळण्याची शक्यता आहे. या महिन्याच्या सुरुवातीला गुजरात सरकारमधील राज्यमंत्री जगदीश विश्वकर्मा यांची केंद्रीय मंत्री सीआर पाटील यांच्या जागी भारतीय जनता पक्षाच्या गुजरात युनिटचे नवे अध्यक्ष म्हणून नियुक्ती करण्यात आली आहे. नवीन बदलात तरुण चेहऱ्यांना संधी दिली जाऊ शकते. यामध्ये पाटीदार नेते हार्दिक पटेल, ओबीसी एकता मंचचे नेते आमदार अल्पेश ठाकोर आणि रिवाबा जडेजा यांचा समावेश होण्याची शक्यता आहे. पंतप्रधान मोदी आणि गृहमंत्री अमित शहा यांनी मुख्यमंत्री पटेल आणि अन्य ज्येष्ठ नेत्यांसोबत सोमवारी रात्री दिल्लीत यासंदर्भात सुमारे पाच तासांची बैठक घेतली. गुजरात विधानसभेचे अध्यक्ष शंकरभाई चौधरी यांना सरकारमध्ये मोठी जबाबदारी देण्याची चर्चा आहे. क्रिकेटपटू रवींद्र जडेजाची पत्नी आमदार रिवाबा जडेजा यांच्यासह दोन महिला नेत्यांनाही या मंत्रिमंडळात मंत्रीपद मिळण्याची अपेक्षा आहे. याशिवाय काँग्रेसमधून भाजपमध्ये सामील होऊन आमदार झालेले अर्जुन मोढवाडिया आणि सीजे चावडा यांनाही मंत्री केले जाण्याची शक्यता वर्तवण्यात आली.१८२ सदस्यांच्या गुजरात विधानसभेत जास्तीत जास्त २७ मंत्री असू शकतात. भूपेंद्र पटेल यांनी १२ डिसेंबर २०२२ रोजी दुसऱ्यांदा गुजरातचे मुख्यमंत्री म्हणून शपथ घेतली आहे.
