Bhiwandi Municipal Corporation : भिवंडी महापालिका निवडणुकीत (Bhiwandi Municipal Corporation) एकाही राजकीय पक्षाला बहुमत न मिळाल्यामुळे तब्बल एक महिन्यानंतर ही कोणत्याच पक्षाच्या उमेदवाराकडून संख्याबळाचे गणित जुळून येण्यात अपयश आले आहे. परिणामी भाजप आणि शिवसेना या महायुतीतील दोन पक्षात फूट पडली असल्याचे समोर येत आहे. सोमवार 16 फेब्रुवारी रोजी उमेदवारी अर्ज दाखल करण्याच्या दिवशी महायुतीतील भाजप पाठोपाठ शिवसेनेने सुद्धा महापौर आणि उपमहापौर पदाची निवडणूक लढवणार असल्याचे शिवसेना पक्षनेते प्रकाश पाटील यांनी शिवसेना प्रमुख पदाधिकारी व ज्येष्ठ नगरसेवकांच्या उपस्थितीमध्ये जाहीर केले आहे. या घोषणेनंतर भिवंडी पालिकेतील सत्तेची समीकरणं पुन्हा एकदा बदलण्याची शक्यता आहे. यात कोण यशस्वी होते हे 20 फेब्रुवारी रोजी स्पष्ट होणार आहे. भिवंडी पालिकेची सार्वत्रिक निवडणूक भाजप आणि शिवसेनेने महायुती म्हणून लढवली होती. यामध्ये भाजपचे 22 आणि शिवसेनेचे 12 असे एकत्र महायुती म्हणून 34 सदस्य निवडून आले आहेत. परंतू बहुमतासाठी 46 ही संख्या जमवण्यात भाजपला अपयश येत असतानाच शिंदेसेनेने कोणार्क विकास आघाडीचे विलास पाटील यांच्यासोबतीने महापौर पदासाठी जुळवाजुळव सुरू केली. त्याच दरम्यान विलास पाटील यांना आर्थिक फसवणुकीच्या गुन्ह्यात अटक केल्याने भाजप आणि शिवसेना यांच्यातील वितुष्ट समोर आले. त्यानंतर भाजपने महापौर पदासाठीची निवडणूक लढवत असल्याचे घोषित केले. त्या पाठोपाठ शिवसेना पक्षाने सुद्धा महापौर आणि उपमहापौर पदाची निवडणूक लढवत असल्याचे स्पष्ट केले आहे.
