Who is Yashwant Pansare? : आपल्या दमदार अभिनयाने आणि विनोदी शैलीने प्रेक्षकांच्या मनावर अधिराज्य गाजवणारे लोकप्रिय मराठी अभिनेते भरत जाधव पुन्हा एकदा नव्या भूमिकेतून प्रेक्षकांच्या भेटीला येत आहेत. त्यांच्या आगामी ‘कोण यशवंत पानसरे?’ या चित्रपटाचा ट्रेलर नुकताच प्रदर्शित झाला असून, यामध्ये भरत जाधव एका वेगळ्याच भूमिकेत दिसत आहेत. त्यामुळे या चित्रपटाबद्दल प्रेक्षकांमध्ये उत्सुकता निर्माण झाली आहे.

पहिल्यांदाच वकिलाच्या भूमिकेत

भरत जाधव यांनी आजवर विविध धाटणीच्या भूमिका साकारत प्रेक्षकांवर आपल्या अभिनयाची छाप पाडली. मात्र, ‘कोण यशवंत पानसरे?’ या चित्रपटात ते पहिल्यांदाच वकिलाची भूमिका साकारताना दिसणार आहेत. हा चित्रपट कोर्टरूम ड्रामा प्रकारातील असून, न्याय, सत्ता आणि सत्य यांच्यातील संघर्षाची उत्कंठावर्धक कथा यात पाहायला मिळणार आहे.

चित्रपटाच्या ट्रेलरमध्ये सदाशिव मापारी नावाच्या वृद्ध व्यक्तीच्या मृत्यू प्रकरणाची झलक पाहायला मिळते. या प्रकरणात भरत जाधव वकिलाच्या भूमिकेत केस लढताना दिसतात. मात्र, कथेला अनपेक्षित वळण मिळतं आणि संशयाची सुई त्यांच्याच दिशेने फिरू लागते. त्यानंतर नेमकं काय घडतं, मृत्यूमागचं सत्य काय आहे आणि या प्रकरणाचा उलगडा कसा होतो, हे जाणून घेण्यासाठी प्रेक्षकांना चित्रपट पाहावा लागेल.

कलाकारांची दमदार फळी

‘कोण यशवंत पानसरे?’ या चित्रपटात भरत जाधव यांच्यासोबत शिवानी रांगोळे, पुष्कर श्रोत्री, शर्वरी जमेनीस, उज्ज्वला जोग, विद्याधर जोशी आणि मिलिंद फाटक यांच्याही महत्त्वाच्या भूमिका आहेत.

कधी आणि कुठे पाहता येणार चित्रपट?

‘कोण यशवंत पानसरे?’ हा चित्रपट १६ ऑक्टोबर २०२६ रोजी झी फाइव्ह (ZEE5) या ओटीटी प्लॅटफॉर्मवर प्रदर्शित होणार आहे. कोर्टरूममधील युक्तिवाद, संशयास्पद मृत्यू आणि सत्याचा शोध अशा घटकांनी सजलेल्या या चित्रपटात भरत जाधव यांचा गंभीर भूमिकेतील अभिनय पाहण्याची संधी प्रेक्षकांना मिळणार आहे.

Jantar Mantar 2.0: अभिजीत दिपकेंसह आशुतोष रांका आणि सौरभ दास अटकेत; आता सीजेपी आंदोलनाची धुरा महाराष्ट्रातील ‘या’ तरुणाकडे..