लोणीकंद, (वार्ताहर) – धर्मवीर छत्रपती श्री संभाजी महाराजांच्या 335 व्या बलिदान दिनानिमित्त श्रीक्षेत्र तुळापूर येथील संभाजी महाराज समाधीस्थळी मराठा नेते मनोज जरांगे पाटील व माजी खासदार शिवाजीराव आढळराव पाटील यांचे चिरंजीव अपूर्व आढळराव पाटील यांची भेट झाली. उपस्थितांनी आढळराव पाटील यांच्या पुत्राची ओळख करून देत असताना उमेदवार शिवाजीदादांचे अपूर्व हे चिरंजीव असल्याचे सांगताच जरांगे पाटलांनी अपूर्व यांना शुभेच्छा दिल्या. यावेळी तुळापूरच्या सरपंच अॅॅड. गुंफा इंगळे, उपसरपंच जयश्री शिवले, माजी खासदार तथा महायुतीचे उमेदवार शिवाजीराव आढळराव पाटील यांचे चिरंजीव अपूर्व आढळराव, उपजिल्हाप्रमुख अनिल काशीद, विपुल शितोळे, माजी उपसरपंच पवन खैरे, नवनाथ शिवले, राजाराम शिवले, सुरेखा शिवले, ग्रामपंचायत सदस्य वर्षा शिवले, सुवर्णा शिवले, सुवर्णा राऊत, अर्चना पुजारी यांसह ग्रामस्थ व शंभूभक्त उपस्थित होते. संभाजी महाराज बलिदान दिवस हा मराठ्यांसाठी अत्यंत वाईट व काळा दिवस आहे. आमच्या राजांनी आपल्या न्यायासाठी स्वतःचा देहसुद्धा आपल्याला दिला. राजांचे हे बलिदान कधीच विसरून जमणार नसल्याचे यावेळी मनोज जरांगे पाटलांनी सांगितले.
