Police Bharti : बीड येथे सुरू असलेल्या पोलीस भरती प्रक्रियेदरम्यान एका तरुणाचा बुधवारी दुपारी मृत्यू झाल्याची दुर्दैवी घटना घडली. दीपक वाव्हुळ (रा. मांडेखेल, ता. परळी) असे मृत तरुणाचे नाव आहे. तो सकाळी परळीहून पोलीस भरतीसाठी बीड येथे दाखल झाला होता. मिळालेल्या माहितीनुसार, कवायत व धावण्याच्या चाचणीनंतर त्याची वैद्यकीय तपासणी करण्यात आली. तपासणीदरम्यान त्याला डीहायड्रेशनचा त्रास होत असल्याचे सांगण्यात आले. दुपारी सुमारे १२.५५ वाजता दीपकने १६०० मीटर धावण्याचे अंतर पूर्ण केले होते. मैदानावरील सीसीटीव्ही फुटेजमध्ये संपूर्ण घटनाक्रम नोंद झाला असून, धावणीनंतर तो स्वतः चालत वैद्यकीय कक्षात जाताना दिसत आहे. तेथे त्याच्यावर प्राथमिक उपचार करण्यात आले आणि सलाईनही लावण्यात आले. मात्र तपासणीदरम्यान त्याच्या नाडीचे ठोके कमी आढळून आल्याने दुपारी १.१४ वाजता त्याला रुग्णवाहिकेतून जिल्हा रुग्णालयात हलवण्यात आले. डॉक्टरांनी तपासणीनंतर त्याला मृत घोषित केले. दीपकचा मृत्यू नेमका कशामुळे झाला, याबाबत स्पष्टता शवविच्छेदन अहवालानंतरच होणार असल्याचे पोलीस सूत्रांनी सांगितले. हृदयविकाराचा तीव्र झटका की अन्य कारण, याचा तपास सुरू आहे. या प्रकरणी शिवाजीनगर पोलीस ठाण्यात अकस्मात मृत्यूची नोंद करण्यात आली आहे. दीपकचे आई-वडील ऊसतोड कामगार असून, घरची आर्थिक परिस्थिती हलाखीची असल्याची माहिती समोर आली आहे. त्याचा एक लहान भाऊ असून तो ऑटोरिक्षा चालवतो. काही दिवस पुण्यात काम केल्यानंतर दीपक गेल्या दोन महिन्यांपासून गावाकडे परतून पोलीस भरतीची तयारी करत होता. त्याच्या अचानक मृत्यूमुळे परिसरात हळहळ व्यक्त होत आहे.