Beed Big Scam: बीड जिल्ह्यातील राष्ट्रीय महामार्गाच्या भूसंपादन आणि मावेजा वाटपातील बहुचर्चित ७३ कोटींच्या घोटाळ्याप्रकरणी मोठी कारवाई करण्यात आली आहे. या प्रकरणाचा तपास करणाऱ्या विशेष तपास पथकाने (SIT) बीडचे तत्कालीन जिल्हाधिकारी अविनाश पाठक यांना लातूरमधून अटक केली आहे. पोलीस अधीक्षक नवनीत कांवत यांनी या अटकेच्या वृत्ताला दुजोरा दिला असून, या कारवाईमुळे महसूल विभागात मोठी खळबळ उडाली आहे. चौकशीनंतर बेड्या – (Beed Big Scam) मिळालेल्या माहितीनुसार, एसआयटीने दिवसभर अविनाश पाठक यांची कसून चौकशी केली. या चौकशीनंतर समाधानकारक उत्तरे न मिळाल्याने त्यांना ताब्यात घेण्यात आले. यापूर्वीच बीडच्या शिवाजीनगर पोलीस ठाण्यात या घोटाळ्याप्रकरणी १० जणांविरोधात गुन्हा दाखल करण्यात आला होता, ज्यामध्ये पाठक यांच्या नावाचाही समावेश होता. नेमकं प्रकरण काय? (Beed Big Scam) बीड जिल्ह्यातून जाणाऱ्या राष्ट्रीय महामार्गासाठी संपादित केलेल्या जमिनीचा मावेजा वाढवून देण्यासाठी हा अजब प्रकार घडला होता. अविनाश पाठक यांची २२ एप्रिल २०२५ रोजी बीडमधून बदली झाली होती. मात्र, ते गेल्यानंतरही त्यांच्या कार्यकाळातील जुन्या तारखा वापरून आणि त्यांच्या बनावट स्वाक्षऱ्या करून वाढीव मोबदल्याचे आदेश काढण्यात आले. या बनावट आदेशांच्या आधारे १५४ प्रकरणांमध्ये तब्बल २४१ कोटी ६२ लाख रुपयांचा वाढीव मोबदला मंजूर करण्यात आला. धक्कादायक बाब म्हणजे, यापैकी ७३ कोटी ४ लाख रुपये खातेदारांना वाटपही करण्यात आले आहेत. हे सर्व आदेश देताना भूसंपादन समन्वय कार्यालयाने कोणत्याही रजिस्टर किंवा नोंदवहीमध्ये याची नोंद ठेवलेली नाही. या गंभीर गुन्ह्याचा तपास सुरुवातीला पोलीस उपाधीक्षक पूजा पवार करत होत्या. मात्र, त्या सध्या रजेवर असल्याने तपासाची चक्रे एम. व्यंकटराम यांनी फिरवली आहेत. त्यांच्या मार्गदर्शनाखाली एसआयटीने ही धडक कारवाई केली. दरम्यान, अटक करण्यात आलेले तत्कालीन जिल्हाधिकारी अविनाश पाठक यांना न्यायालयात हजर केले जाणार असून, या घोटाळ्याचे धागेदोरे आणखी कोणापर्यंत पोहोचले आहेत, याचा तपास पोलीस करणार आहेत.