सातारा : राज्यात सध्या करोनाची दुसरी लाट आता ओसरली आहे. रुग्ण संख्या आणि मृत्यू दरात बऱ्यापैकी घट आली आहे. मात्र असे असले तरी राज्यात पुन्हा एकदा करोनाने डोके वर काढले आहे.  राज्यातील महत्वाच्या जिल्ह्यात करोनाच्या वाढत्या रुग्णसंख्येच्या पार्श्वभूमीवर प्रशासनाने इथे आणखी एकदा कडक निर्बंध लावले आहेत.

सातारा जिल्ह्यामध्ये करोना रुग्ण वाढीचा दर १० टक्क्यांच्यावर गेला असल्याने सातारा जिल्हा चौथ्या स्तरामध्ये समाविष्ट झाला आहे. त्यामुळे जिल्हाधिकारी शेखर सिंह यांनी संपूर्ण सातारा जिल्ह्यामध्ये चौथ्या स्तरामधील निर्बंध लागू केले असून अत्यावश्यक सेवा वगळता सर्व प्रकारची दुकाने बंद ठेवण्याचे आदेश जिल्हाधिकाऱ्यांनी काढले आहेत.

जिल्हाधिकाऱ्यांच्या आदेशानुसार सोमवार ते शुक्रवार हे निर्बंध लागू असतील. तसेच शनिवार आणि रविवार हे दोन दिवस जिल्ह्यात पूर्णतः संचारबंदी पुढेही सुरू राहणार आहे. राज्य शासनाच्या २५ जून रोजी काढण्यात आलेल्या आदेशानुसार आरटीपीसीआर चाचण्यांद्वारे जी रुग्णवाढ नोंदवली जाते, त्यानुसार संबंधित जिल्ह्याचा स्तर ठरविण्याच्या सूचना जिल्हाधिकार्‍यांना करण्यात आल्या आहेत. आरटीपीसीआर चाचण्यानुसार सातारा जिल्ह्याचा रुग्ण वाढीचा दर १२ टक्‍क्‍यांवर जाऊन पोहोचला. त्यामुळे जिल्हाधिकार्‍यांनी हे निर्बंध लागू केले आहेत.

* साताऱ्यात काय सुरु काय बंद…
* सर्व शाळा महाविद्यालय कोचिंग क्लासेस पूर्णपणे बंद राहणार
* अत्यावश्यक सेवेव्यतिरिक्त सर्व दुकाने बंद राहणार
* अत्यावश्यक बाबींची दुकाने आता सकाळी नऊ ते दुपारी दोन वाजेपर्यंत सुरू राहणार
* हॉटेल, रेस्टॉरंट बंद राहतील, पार्सल सेवा सकाळी ९ ते रात्री ८ वेळेत सुरू राहील
* कोणत्याही क्रीडा स्पर्धा घेता येणार नाहीत
* सामाजिक सांस्कृतिक धार्मिक प्रार्थना स्थळ राहणारया बाबी निर्बंध पाळून सुरू राहतील
* सार्वजनिक जागा, खुली मैदाने या ठिकाणांवर सोमवार ते शुक्रवार पहाटे ५ ते सकाळी ९ या वेळेत व्यायाम व चालण्यास परवानगी आहे.
* लग्न आणि अंत्यविधी यांच्यासाठी निर्बंध ठेवून परवानगी
* बांधकामांना परवानगी मात्र कामगारांच्या राहण्याची व्यवस्था करणे आवश्यक
* कृषी दुकाने आठवडाभर दुपारी दोन वाजेपर्यंत सुरू राहतील
* केश कर्तनालय सुरू राहतील
* सार्वजनिक परिवहन बस सेवा ५० टक्के क्षमतेने सुरू राहील
* मालवाहतूक सुरु ठेवण्यास परवानगी
* खासगी वाहने, टॅक्सी, बसेस, लांब पल्ल्याच्या रेल्वेद्वारे आंतरजिल्हा प्रवास करण्यास परवानगी
* आयसोलेशन बबलमध्ये चित्रीकरणास परवानगी
* बाजार समित्या सकाळी ७ ते दुपारी २ वाजेपर्यंत सुरू राहतील

…यांना ई पास बंधनकारक
पाचव्या स्तरातील जिल्ह्यातून जे प्रवासी सातारा जिल्ह्यात येणार आहेत त्यांना ई पास बंधनकारक आहे. पास नसेल तर त्यांना प्रवेश दिला जाणार नाही. त्या व्यतिरिक्त पहिल्या, दुसऱ्या, तिसऱ्या आणि चौथ्या स्तरातील जिल्ह्यातून येणाऱ्या प्रवाशांना ई पासचे बंधन राहणार नाही.