चंदिगढ – पंजाबमधील भटिंडा लष्करी कॅम्पमध्ये सहकारी चार जवानांची हत्या केल्याचा खळबळजनक प्रकार गेल्या आठवड्यात घडला होता. या प्रकरणाचा उलगडा झाला असून एका लष्करी जवानाला अटक करण्यात आली आहे. सुरुवातीला हीच व्यक्ती प्रत्यक्षदर्शी होती. मात्र पोलिसांचा त्याच्यावर दाट संशय होता. अखेर त्याला अटक करण्यात आली.

गनर देसाई मोहन असे अटक करण्यात आलेल्या लष्करी जवानाचे नाव आहे. सूत्रांनी दिलेल्या माहितीनुसार, भटिंडा लष्करी कॅम्पमध्ये गोळीबाराच्या घटनेत प्रत्यक्षदर्शी असलेल्या व्यक्तीलाच हत्या प्रकरणी अटक करण्यात आली. सीआयएमध्ये त्याची पोलिसांनी रात्री उशिरापर्यंत चौकशी केली. देसाई मोहनने या चौकशीत धक्कादायक असे खुलासे केले आहेत. सदर चारही जवानांनी लैंगिक शोषण केल्याने त्यांची हत्या केल्याचा जबाब देसाई मोहनने दिला.

दरम्यान, बुधवारी पहाटे चार जवानांची भटिंडा लष्करी कॅम्पमध्ये गोळी झाडून हत्या करण्यात आली होती. या घटनेवेळी सर्व जवान त्यांच्या बराकीत होते. मृतांमध्ये गनर सागर बन्ने, करनालेश आर, योगेश कुमार जे आणि संतोष एम नागराल यांचा समावेश आहे. सर्वजण आर्टिलरीच्या 80 मीडियम रेजिमेंटचे होते.

घटनास्थळी इंसास रायफलच्या 19 रिकाम्या पुंगळ्या सापडल्या होत्या. त्यावेळी प्रत्यक्षदर्शी म्हणून पुढे आलेल्या देसाइ मोहनने रायफलसह हल्लेखोरांना पाहिल्याचा दावा केला होता. त्याच्या जबाबानुसार दोन अज्ञातांविरोधात पोलिसांनी गुन्हा दाखल केला होता.या प्रकरणी पोलिसांनी चौकशीसाठी 10 जवानांना नोटीस पाठवली होती.