Baramati News : राष्ट्रवादी काँग्रेस पक्षाचे नेते अजित पवार यांच्या निधनानंतर त्यांना आगळ्यावेगळ्या पद्धतीने श्रद्धांजली अर्पण करण्यासाठी बारामतीतील तरुण आणि सामाजिक कार्यकर्ते सरसावले आहेत. केवळ शोक व्यक्त न करता समाजासाठी काहीतरी ठोस कार्य करण्याच्या उद्देशाने ‘कृतीतून श्रद्धांजली’ हा उपक्रम राबवण्यात आला.या अंतर्गत आयोजित रक्तदान शिबिरात ६२ बाटल्या रक्त संकलित करून बारामतीच्या लाडक्या अजितदादांना आदरांजली वाहण्यात आली. शैक्षणिक संस्थांचा पुढाकार हा स्तुत्य उपक्रम बारामतीतील गणेश पॅरामेडिकल इन्स्टिट्यूट आणि आय स्टेपअप कोडिंग अकॅडमी यांच्या संयुक्त विद्यमाने आयोजित करण्यात आला होता. विशेष म्हणजे, या दोन्ही संस्थांमधील विद्यार्थ्यांनी अतिशय उत्साहाने यात सहभाग नोंदवला. “रक्तदान हेच श्रेष्ठ दान” असून याद्वारे गरजूंचे प्राण वाचवणे, हीच खऱ्या अर्थाने अजित पवार यांना दिलेली मोठी श्रद्धांजली ठरेल, अशी भावना विद्यार्थ्यांनी व्यक्त केली. राजकीय आणि सामाजिक मान्यवरांची उपस्थिती या शिबिराप्रसंगी विविध राजकीय पक्षांच्या नेत्यांनी उपस्थित राहून या उपक्रमाचे कौतुक केले. यामध्ये ज्येष्ठ नेते व बारामती नगरपालिकेचे माजी नगराध्यक्ष (राष्ट्रवादी काँग्रेस पक्ष) कैलास चव्हाण, संघमित्रा काळुराम चौधरी नगरसेविका (बहुजन समाज पार्टी) या मान्यवरांनी उपस्थित राहून विद्यार्थ्यांच्या सामाजिक जाणीवेचे अभिनंदन केले. यावेळी एकूण ६२ रक्त बाटल्या संकलित करण्यात आल्या. हा उपक्रम बारामती शहरात चर्चेचा आणि कौतुकाचा विषय ठरला आहे.
