Ambani Family : अंबानींच्या ‘अँटिलिया’मध्ये बाप्पाचं शाही आगमन; राधिका-अनंतचा खास लूक, VIDEO व्हायरल
Ambani Family : दरवर्षीप्रमाणे यंदाही अंबानी कुटुंबाने मुंबईतील आपल्या ‘अँटिलिया’ निवासस्थानी गणपती बाप्पाचे मोठ्या थाटामाटात स्वागत केले.
Ambani Family : आजपासून गणेशोत्सवाला सुरुवात झाली असून देशभरात गणपती बाप्पाच्या आगमनाचा उत्साह पाहायला मिळत आहे. सर्वसामान्यांपासून सेलिब्रिटींपर्यंत अनेकजण बाप्पाच्या स्वागतासाठी सज्ज झाले आहेत. दरवर्षीप्रमाणे यंदाही अंबानी कुटुंबाने मुंबईतील आपल्या ‘अँटिलिया’ निवासस्थानी गणपती बाप्पाचे मोठ्या थाटामाटात स्वागत केले.
मुकेश अंबानी यांचा मुलगा अनंत अंबानी आणि सून राधिका मर्चंट यांनी यंदाच्या गणेशोत्सवात विशेष आकर्षण ठरले. राधिका तिचा भाचा आणि ईशा अंबानीचा मुलगा कृष्णाला कडेवर घेऊन बाप्पाच्या स्वागतासाठी सहभागी झाली होती. बाप्पाची मिरवणूक पाहताच राधिका आनंदाने नाचताना आणि टाळ्या वाजवताना दिसली. तिचा उत्साह पाहून कृष्णानेही तिला घट्ट मिठी मारली. त्यानंतर राधिकाने कृष्णाला जवळ घेत बाप्पाचे भक्तिभावाने स्वागत केले. या सुंदर क्षणांचा व्हिडीओ सोशल मीडियावर व्हायरल होत आहेत.
View this post on Instagram
राधिका-अनंतचा हटके लूक
गणेशोत्सवासाठी राधिका मर्चंट आणि अनंत अंबानी यांनी एकसारख्या रंगाचे पारंपरिक पोशाख परिधान केले होते. राधिकाने केशरी रंगाचा सुंदर सूट घातला होता, तर अनंतने केशरी कुर्ता-पायजमा आणि त्यावर जॅकेट परिधान केले होते.
सोशल मीडियावर समोर आलेल्या एका व्हिडीओमध्ये फुलांनी आकर्षक पद्धतीने सजवलेल्या ट्रकमधून गणपती बाप्पाची मूर्ती आणली जात असल्याचे दिसत आहे. या मिरवणुकीच्या मागे राधिका आणि अनंत कारमधून जाताना दिसत आहेत.
बाप्पाच्या स्वागतासाठी संपूर्ण ‘अँटिलिया’ फुलांनी सजवण्यात आले होते. अंबानी कुटुंबाच्या गणेशोत्सवाचे फोटो आणि व्हिडीओ सोशल मीडियावर समोर येताच नेटकऱ्यांनी त्यावर भरभरून प्रतिक्रिया दिल्या आहेत.
View this post on Instagram
‘अँटिलियाचा राजा’ विराजमान
अंबानी कुटुंबात दरवर्षी गणेशोत्सव मोठ्या उत्साहात आणि भक्तिभावाने साजरा केला जातो. अनंत अंबानी आणि राधिका मर्चंट यांच्या लग्नानंतर राधिकाही या कौटुंबिक परंपरेचा महत्त्वाचा भाग झाली आहे. यंदाही अँटिलियामध्ये विराजमान झालेल्या गणपती बाप्पाला ‘अँटिलियाचा राजा’ असे नाव देण्यात आले आहे. अँटिलियातील गणेशोत्सवाला बॉलिवूडमधील अनेक कलाकार आणि सेलिब्रिटी उपस्थित राहणार आहेत.
