पुणे – पुणे लोकसभा मतदारसंघातून भारतीय जनता पक्षाकडून गिरीश बापट यांनी, तर बारामती लोकसभा मतदारसंघातून कांचन कुल यांनी उमेदवारी अर्ज दाखल केला.
पुणे लोकसभा मतदारसंघासाठी बापट यांनी जिल्हाधिकारी कार्यालयात जिल्हाधिकारी नवल किशोर राम यांच्याकडे अर्ज दाखल केला. तर बारामती मतदारसंघातून भाजपचे उमेदवार कांचन कुल यांनी विधानभवन येथे अतिरिक्त विभागीय आयुक्त तथा निवडणूक निर्णय अधिकारी सुभाष डुंबरे यांच्याकडे अर्ज दाखल केला. यावेळी महसूलमंत्री चंद्रकांत पाटील, पशुसंवर्धन व दुग्धविकासमंत्री महादेव जानकर, राज्यमंत्री विजय शिवतारे, खासदार संजय काकडे, आमदार डॉ. निलम गोऱ्हे, भाजपचे शहराध्यक्ष योगेश गोगावले, शिवसंग्रामचे अध्यक्ष आमदार विनायक मेटे, समाजकल्याण राज्यमंत्री दिलीप कांबळे, माजी आमदार चंद्रकांत मोकाटे, राहुल कुल आदी यावेळी उपस्थित होते.
यावेळी बापट म्हणाले, जिल्ह्यात आणि शहरात केलेल्या विकासकामांमुळे आमचा विजय सुकर होणार आहे. तसेच, संस्कृती आणि संस्कारानुसार विरोधीपक्षातील नेत्यांसोबत देखील माझे मैत्रीपूर्ण संबंध आहेत. त्यामुळे निवडणुकीच्या प्रचाराची पातळी न ओलांडता विकासाच्या मुद्द्यांवर वैचारीक प्रचार करणार आहे.
कांचन कुल म्हणाल्या, आतापर्यंत बारामतीचाच विकास झाला आहे. परंतु, इतर ठिकाणी भकास आहे, अशी वस्तुस्थिती आहे. त्यामुळे आमचा विजय निश्‍चित आहे.
