अयोध्या :- अयोध्येतील राम मंदिरात पाच वर्षे वयाच्या बाल भगवान रामाची मूर्ती बसवण्यात येणार आहे. 15 ते 24 जानेवारी 2024 दरम्यान कोणत्याही एका दिवशी गर्भगृहातील मूर्तीचा अभिषेक केला जाईल. यावर्षी ऑक्‍टोबरपर्यंत मंदिराच्या तळमजल्याचे काम पूर्ण होईल. मग फक्त फिनिशिंग टच राहतील. डिसेंबरपर्यंत ते पूर्ण होईल.

श्री रामजन्मभूमी तीर्थ क्षेत्र ट्रस्टचे सरचिटणीस चंपत राय यांनी रविवारी ही माहिती दिली. तसेच हे मंदिर इतके भक्कम असेल, की किमान एक हजार वर्षे दुरुस्ती करावी लागणार नाही.

राय म्हणाले, भगवान श्रीराम संपूर्ण कुटुंबासह तळमजल्यावर बसतील. सध्या योजनेत दुसऱ्या मजल्यावर एकही मूर्ती बसवली जाणार नाही. मंदिराला उंची देण्यासाठीच दुसरा मजला भव्य बनवण्यात येणार आहे. मंदिराच्या बांधकामात सध्या 21 लाख घनफूट ग्रॅनाइट, वाळूचे दगड आणि संगमरवरी वापरण्यात येत आहे.

राम मंदिराची चौकट संगमरवरी आहे, तर दरवाजे महाराष्ट्रातील सागवान लाकडाचे आहेत. त्यावर कोरीव कामही सुरू झाले आहे. मंदिराचा प्रत्येक आकार, प्रत्येक भाग अशा प्रकारे बनवायचा आहे. 1000 वर्षे या बांधकामाला काहीही होणार नाही, दुरुस्तीचीही गरज भासणार नाही.

राम मंदिराच्या तळमजल्याचे 80 टक्के काम पूर्ण झाले आहे. त्यात 162 खांब करण्यात आले आहेत. आता या खांबांमध्ये 4500 हून अधिक मूर्ती कोरल्या जात आहेत. यात त्रेतायुगाची झलक पाहायला मिळणार आहे. यासाठी केरळ-राजस्थानमधून 40 कारागिरांना पाचारण करण्यात आले आहे.

वास्तुविशारद अभियंता अंकुर जैन यांनी सांगितले की, प्रत्येक खांब 3 भागात विभागलेला आहे. प्रत्येक खांबावर 20 ते 24 मूर्ती कोरल्या जात आहेत. वरच्या भागात 8 ते 12 मूर्ती बनवल्या जात आहेत. मधल्या भागात 4 ते 8 तर खालच्या भागात 4 ते 6 मूर्ती कोरल्या जात आहेत. एका कारागिराला एका स्तंभावर मूर्ती कोरण्यासाठी सुमारे 200 दिवस लागतात.