Thugs Life Trailer : दक्षिणात्य स्टार कलाकार कमल हासन यांच्या बहुप्रतिक्षित ‘ठग लाइफ’ या चित्रपटाची जोरदार चर्चा केली जात होती. अखेर या चित्रपटाचा ट्रेलर रिलीज झाला असून 2 मिनिटांच्या ट्रेलरमध्ये कमल हासनची जबरदस्त अॅक्शन पाहायला मिळत आहे. हा चित्रपट ५ जून रोजी थिएटरमध्ये प्रदर्शित होणार आहे. या चित्रपटाच्या माध्यमातून दिग्दर्शक मणीरत्नम आणि कमल हसल तब्बल ३६ वर्षांनंतर एकत्र आले आहेत. मणिरत्नम यांनी 1987 मध्ये ‘नायकन’ या चित्रपटाच्या माध्यमातून कमल हासनसोबत काम केले होते. या चित्रपटाच्या ट्रेलरवरून असे दिसते की कमल हासन एक मुलगा दत्तक घेतो. जो पुढे जाऊन मोठा झाल्यावर स्वार्थापोटी आपल्याच कुटुंबाला उद्धवस्त करतो. शेवटी कमल हासनच आपल्या मुलाच्या मागे लागतात आणि दोघांमध्ये एक खेळ सुरू होतो. आता तो खेळ काय आहे, तो मुलगा आपल्याला दत्तक घेतलेल्या वडील आणि त्याच्या कुटुंबासोबत असे का वागतो हे जाणून घेण्यासाठी ठग लाइफ हा चित्रपट रिलीज होण्याची वाट पाहावी लागेल. या चित्रपटात दाक्षिणात्य अभिनेत्री त्रिशा कृष्णन हिची देखील विशेष भूमिका आहे. याशिवाय ऐश्वर्या लक्ष्मीचे पात्रही लक्षवेधी असणार आहे. चित्रपटाला एआर रहमान यांचे संगीत लाभले आहे. चित्रपटाचा ट्रेलर रिलीज झाल्यानंतर कमल हासनच्या चाहत्यांकडून वेगवेगळ्या प्रतिक्रिया पाहायला मिळत आहेत. काहींना चित्रपटाचा ट्रेलर खूपच आवडला आहे, तर काहींनी चित्रपटाकडून थोडी जास्त अपेक्षा होत्या, असे स्पष्ट मत व्यक्त केले आहे. महेश मांजेरकरही लक्षवेधी भूमिकेत मराठमोळे अभिनेते महेश मांजरेकरही ठग लाइफ चित्रपटाचा भाग असणार आहेत. त्यांची या चित्रपटात महत्वाची भूमिका असणार आहे. ट्रेलरमध्ये त्याची झलक दिसते. याशिवाय सिलंबरासन टीआर, अशोक सेल्वन,अली फजल, ऐश्वर्या लक्ष्मी, जोजू जॉर्ज असे अनक कलाकार आहेत.
