Jammu-Kashmir : जम्मू आणि काश्मीरच्या पाच जिल्ह्यांमध्ये हिमस्खलनाचा धोका आहे. त्यामध्ये गंदरबल, डोडा, किश्तवार, पूंछ आणि रामबन जिल्ह्यांचा समावेश आहे. पर्वतीय भागात अलिकडच्या काळात झालेल्या मुसळधार बर्फवृष्टीच्या पार्श्वभूमीवर हवामान खात्याने हा इशारा जारी केला. पुढील २४ तासांत पाचही जिल्ह्यांमध्ये कमी जोखमीचे हिमस्खलन होण्याची शक्यता आहे. त्यामुळे लोकांनी हिमस्खलन होण्याची शक्यता असलेल्या भागात जाणे टाळावे. जम्मू आणि काश्मीर २५ ते २९ डिसेंबरपर्यंत ढगाळ राहील. २९ डिसेंबर रोजी उंच भागात हलक्या हिमवर्षावाची शक्यता आहे. ३० डिसेंबर आणि १ जानेवारी रोजी आकाश ढगाळ राहील, काही मैदानी भागात हलका पाऊस पडेल आणि पर्वतांमध्ये हलका हिमवर्षाव होईल. पुढील पाच दिवस जम्मू विभागाच्या मैदानी भागात मध्यम ते दाट धुके राहील. श्रीनगरमध्ये कमाल तापमान १२.९ अंश सेल्सिअस नोंदवले गेले, जे सामान्यपेक्षा ३.९ अंश जास्त आहे. किमान तापमान ३.० अंश सेल्सिअस होते, जे सामान्यपेक्षा ५.४ अंश जास्त आहे. काश्मीरचे प्रवेशद्वार असलेल्या काझीगुंडमध्ये कमाल तापमान १२.२ अंश सेल्सिअस होते, जे सामान्यपेक्षा ३.३ अंश जास्त आहे. किमान तापमान ३.२ अंश सेल्सिअस होते, जे सामान्यपेक्षा ५.६ अंश जास्त आहे. पहलगाममध्ये कमाल तापमान १०.२ अंश सेल्सिअस होते, जे सामान्यपेक्षा ३.३ अंश जास्त होते. किमान तापमान उणे २.२ अंश सेल्सिअस होते, जे सामान्यपेक्षा ३.० अंश जास्त होते. गुलमर्गमध्ये कमाल तापमान २.४ अंश सेल्सिअस नोंदवले गेले, जे सामान्यपेक्षा १.० अंश कमी होते. किमान तापमान उणे ४.२ अंश सेल्सिअस होते, जे सामान्यपेक्षा १.८ अंश जास्त होते. काश्मीरला लडाखशी जोडणाऱ्या जोझिला खिंड या महत्त्वाच्या मार्गावरील वाहनांची वाहतूक पूर्ववत करण्यासाठी बीआरओ कर्मचारी आणि यंत्रसामग्री तात्काळ तैनात करण्यात आली. ११,६०० फूटांपेक्षा जास्त उंचीवर असलेला झोजिला खिंड हिमवृष्टीनंतर बंद होतो. यावेळी, लडाखला पोहोचणारा पुरवठा खंडित होऊ नये म्हणून मार्ग शक्य तितका काळ खुला ठेवण्याचा प्रयत्न केला जाईल.
