दुबई :- टी-20 विश्‍वकरंडक क्रिकेट स्पर्धेतील बांगलादेशविरुद्धच्या लढतीत ऑस्ट्रेलियाने अवघ्या 38 चेंडूंतच विजय मिळवला. या विजयाच्या जोरावर त्यांनी या स्पर्धेच्या उपांत्य फेरीतील स्थान निश्‍चित केले आहे.

ऑस्ट्रेलियाचा सलामीवीर कर्णधार ऍरन फिंच याने नाणेफेक जिंकत प्रथम गोलंदाजी करण्याचा निर्णय घेतला. त्याचा हा निर्णय गोलंदाजांनी सार्थ ठरवला. सुरुवातीला जोस हेझलवूडने प्रमुख फलंदाजांना बाद केले, त्याचवेळी लेग स्पीन गोलंदाज ऍडम झम्पाने 3 गडी बाद करत त्यांच्या फलंदाजीची वाताहत केली.

महंमद नईम 17, कर्णधार महंमदुल्लाह व शमीम हुसेन यांनी प्रत्येकी 16 धावांची खेळी केली. या तीन फलंदाजांना अपवाद वगळता त्यांच्या एकाही फलंदाजाला दोन अंकी धावसंख्या उभारता आली नाही. त्यांचा डाव 15 षटकांत अवघ्या 73 धावांवर संपुष्टात आला.

ऑस्ट्रेलियाकडून ऍडम झम्पाने 5 गडी बाद केले. त्याला सुरेख साथ देताना मिशेल स्टार्क व जोश हेझलवूड यांनी प्रत्येकी 2 गडी बाद केले. ग्लेन मॅक्‍सवेलने 1 बळी घेतला.

विजयासाठी आवश्‍यक धावांचा पाठलाग करताना ऑस्ट्रेलियाने अफलातून फटकेबाजी केली. त्यांचा सलामीवीर कर्णधार ऍरन फिंचने डेव्हिड वॉर्नरच्या साथीत संघाचा 5 व्या षटकातच अर्धशतकी सलामी दिली. वॉर्नर 18 धावांवर बाद झाल्यावर फिंचने केवळ 20 चेंडूत 2 चौकार व 4 षटकारांच्या मदतीने 40 धावांची खेळी केली. त्यानंतर मिशेल मार्शने षटकार फटकावत संघाचा विजय साकार केला. त्याने 5 चेंडूत 2 चौकार व 1 षटकार फटकावताना नाबाद 16 धावांची खेळी केली.

बांगलादेशकडून तस्कीन अहमद व शोरीफुल इस्लाम यांनी प्रत्येकी 1 बळी घेतला. या स्पर्धेत सर्व सामने गमावल्याने बांगलादेशचे आव्हान संपले. यापूर्वी झालेल्या मालिकेत बांगलादेशने ऑस्ट्रेलिया व न्यूझीलंड यांच्या विरुद्ध मायदेशात मालिका विजय मिळवला होता. त्यामुळे विश्‍वकरंडक स्पर्धेत ते सरस कामगिरी करतील अशी अपेक्षा होती. मात्र, त्यांनी या अपेक्षा फोल ठरवल्या.

संक्षिप्त धावफलक

बांगलादेश – 15 षटकांत सर्वबाद 73 धावा. (महंमद नईम 17, महंमदुल्लाह 16, शमीम हुसेन 16, ऍडम झम्पा 5-19, जोश हेझलवूड 2-8, मिशेल स्टार्क 2-21, ग्लेन मॅक्‍सवेल 1-6). ऑस्ट्रेलिया – 6.2 षटकांत 2 बाद 78 धावा. (ऍरन फिंच 40, डेव्हिड वॉर्नर 18, मिशेल मार्श नाबाद 16, शोरीफुल इस्लाम 1-9, तस्कीन अहमद 1-36).