Atul Benke : गावातील सार्वजनिक कार्यक्रमांमध्ये राजकीय हस्तक्षेप होत असल्याचा आरोप करत माजी आमदार अतुल बेनके (Atul Benke) यांनी पुढील काळात पिंपळवंडी येथील सार्वजनिक कार्यक्रमाला उपस्थित राहणार नसल्याचा इशारा दिला आहे. स्वर्गीय वल्लभ बेनके यांच्या नावाला जाणीवपूर्वक विरोध होत असल्याचा आरोप त्यांनी केला आहे. पिंपळवंडी गावात नव्याने उभारण्यात आलेल्या प्रवेशद्वाराचे बुधवारी (दि. २२) लोकार्पण करण्यात आले. या कार्यक्रमाच्या निमंत्रण पत्रिकेत माजी आमदार अतुल बेनके (Atul Benke) यांचे नाव समाविष्ट करण्यास जुन्नरचे आमदार शरद सोनवणे यांनी विरोध केल्याचे ग्रामस्थांकडून समजल्याचे बेनके यांनी सांगितले. याबाबत ग्रामस्थांनी फोनवरून माहिती दिल्याचा दावा त्यांनी केला. अतुल बेनके (Atul Benke) यांची पिंपळवंडी गावात शेती असून ते गावचे खातेदार आहेत. स्वर्गीय वल्लभ बेनके यांच्या काळापासून गावाच्या विकासकामांमध्ये, यात्रांमध्ये तसेच बैलगाडा शर्यतींसाठी बेनके कुटुंबाकडून सातत्याने मदत केली जात आहे. Atul Benke मळगंगा माता नवरात्र उत्सव मंडळाने हाती घेतलेल्या प्रवेशद्वार निर्मितीसाठी गावातील सबाजी लेंडे, शरद लेंडे व रघुनाथ लेंडे यांनी मदतीचे आवाहन केले होते. त्यानुसार बेनके कुटुंबाने १ लाख १ हजार रुपयांची आर्थिक मदत केल्याचे त्यांनी स्पष्ट केले. “हक्काबरोबर कर्तव्याची जाणीवही असावी,” गावच्या विकासासाठी ग्रामस्थांनी एखाद्या व्यक्तीकडे हक्काने मदत मागितली असेल, आणि ती मदत देण्यात आली असेल तर राजकारणाच्या पलीकडे विचार करून गावच्या सार्वजनिक कार्यक्रमात गावाच्या विकासासाठी मदत करणाऱ्या व्यक्तीचा सन्मान राखला गेला पाहिजे, अन्यथा तो ग्रामस्थांचा अपमान ठरतो. मदत करणाऱ्या व्यक्तीचा अवमान होता कामा नये याची काळजी ग्रामस्थांनी घेतली पाहिजे. जाणीवपूर्वक लोकप्रतिनिधीचा अपमान होत असेल तर आपण ग्रामस्थ म्हणून कर्तव्यात चूक केली असल्याची भावना राष्ट्रवादीच्या कार्यकर्त्यांनी व्यक्त केली.
