भोसरी – भोसरीतील इंद्रायणीनगर येथील श्री. संत ज्ञानेश्वर महाराज क्रीडा संकुलातील सिंथेटिक ट्रॅकवर पोलीस भरतीच्या सरावासाठी येणाऱ्या उमेदवारांची संख्या वाढल्याने ॲथलेटिक्सपटूंच्या नियमित सरावाचे नियोजन बिघडत असल्याची तक्रार खेळाडू आणि प्रशिक्षकांनी केली आहे. पोलीस भरतीच्या उमेदवारांच्या सरावाला विरोध नसून, ॲथलेटिक्सपटूंसाठी उभारलेल्या सिंथेटिक ट्रॅकवर त्यांनाच प्राधान्य मिळावे आणि भरतीच्या सरावासाठी स्वतंत्र पर्यायी व्यवस्था करावी, अशी मागणी होत आहे.

पिंपरी-चिंचवड शहरातून राष्ट्रीय आणि आंतरराष्ट्रीय स्तरावरील खेळाडू घडावेत, या उद्देशाने महापालिकेने या क्रीडा संकुलाची उभारणी केली आहे. येथे ४०० मीटर लांबीचा आठ लेनचा सिंथेटिक ट्रॅक आहे. शहरातील ॲथलेटिक्सपटूंसाठी हे महत्त्वाचे सराव केंद्र असून, सकाळी आणि सायंकाळी मिळून सुमारे १५० ते २०० खेळाडू येथे नियमित सराव करतात.महापालिकेने सुमारे चार कोटी रुपये खर्च करून नुकतेच सिंथेटिक ट्रॅकचे काम केले आहे.

गेल्या काही वर्षांत दुरुस्तीमुळे ट्रॅक वारंवार बंद राहत असल्याने खेळाडूंच्या सरावात खंड पडत होता. आता ट्रॅक उपलब्ध झाल्यानंतर सरावासाठी होणारी गर्दी आणि काही वेळा भरतीच्या प्रात्यक्षिक चाचण्यांसाठी ट्रॅक आरक्षित ठेवला जात असल्याने नियमित खेळाडूंच्या प्रशिक्षणावर मर्यादा येत असल्याचे प्रशिक्षकांचे म्हणणे आहे.

नियोजनबद्ध सरावासाठी स्वतंत्र वेळेची गरज
ॲथलेटिक्समध्ये वेग, सहनशक्ती आणि तंत्र विकसित करण्यासाठी नियमित व नियोजनबद्ध सराव आवश्यक असतो. स्पर्धांमध्ये सहभागी होणाऱ्या खेळाडूंना प्रशिक्षकांच्या मार्गदर्शनाखाली ठरावीक वेळेत सराव पूर्ण करावा लागतो. मात्र, ट्रॅकवर गर्दी झाल्यास सरावात अडथळे निर्माण होतात. शहरात पर्यायी सिंथेटिक ट्रॅकची सुविधा सहज उपलब्ध नसल्याने खेळाडूंना इतर मैदानांवर जाण्यासाठी वेळ आणि प्रवासखर्चही करावा लागतो.

पोलीस भरतीची तयारी करणाऱ्या उमेदवारांनाही सरावासाठी मैदानाची आवश्यकता असते. त्यामुळे दोन्ही गटांच्या गरजा लक्षात घेऊन महापालिकेने वेळेचे योग्य नियोजन करणे गरजेचे आहे. मात्र, ॲथलेटिक्ससाठी विशेष सुविधा म्हणून उभारलेल्या सिंथेटिक ट्रॅकचा मूळ उद्देश कायम ठेवत खेळाडूंच्या सरावाला प्राधान्य देण्याची मागणी होत आहे.

“सिंथेटिक ट्रॅकवर ॲथलेटिक्सच्या खेळाडूंना नियोजनबद्ध आणि सुरक्षित सराव करता येणे आवश्यक आहे. सरावात वारंवार अडथळे आल्यास त्यांच्या कामगिरीवर परिणाम होऊ शकतो. महापालिकेने ॲथलेटिक्सच्या प्रशिक्षणाला प्राधान्य देऊन पोलीस भरतीच्या सरावासाठी स्वतंत्र पर्यायी व्यवस्था करावी.”- दिनेश देवकाते, प्रशिक्षक, भोसरी.

Top 15 News: पुणे शिक्षक-पदवीधर निवडणुकीसाठी भाजपची तयारी, एलन मस्क यांच्या फ्लाइंग कारची चर्चा आणि गौरव मोरेने घेतला iPhone 18 Pro , वाचा टॉप १५ बातम्या