Ashok Kharat : नाशिकमधील गाजत असलेल्या महिला लैंगिक अत्याचार प्रकरणात आरोपी अशोक खरात याला न्यायालयाने 29 मार्चपर्यंत पोलीस कोठडी सुनावली आहे. कोठडीची मुदत संपल्यानंतर आज त्याला न्यायालयात हजर करण्यात आले होते. यावेळी सरकारी पक्षाने तपासासाठी अधिक वेळ आवश्यक असल्याचे सांगत कोठडी वाढवण्याची मागणी केली, जी न्यायालयाने मान्य केली. Ashok Kharat सुनावणीपूर्वी खरातची जिल्हा रुग्णालयात वैद्यकीय तपासणी करण्यात आली. त्यानंतर कडेकोट पोलीस बंदोबस्तात त्याला न्यायालयात आणण्यात आले. प्रकरणाच्या संवेदनशीलतेमुळे कोर्ट परिसरात मोठ्या प्रमाणात पोलिसांचा ताफा तैनात करण्यात आला होता, तसेच वकिलांची आणि नागरिकांची मोठी गर्दीही पाहायला मिळाली. दरम्यान, SIT अधिकारी किरणकुमार सूर्यवंशी यांनी न्यायालयात तपासाची माहिती देताना अनेक गंभीर आरोप मांडले. आरोपी महिलांना खडे, पेढे देत आणि पाण्यात काही पदार्थ मिसळून त्यांना अस्वस्थ करत असे, त्यानंतर त्यांचे शोषण केल्याचा आरोप करण्यात आला. Ashok Kharat Ashok Kharat News तसेच आरोपीच्या फार्महाऊसमधून पिस्तूल, काडतुसे, रोकड आणि इलेक्ट्रॉनिक साहित्य जप्त केल्याची माहिती देण्यात आली. काही काडतुसे वापरले गेल्याचा संशय असून त्याबाबत तपास सुरू आहे. काही धार्मिक विधींमध्ये नरबळीचा संशयही व्यक्त करण्यात आला आहे. अशोक खरात स्वतःला ‘सिद्ध पुरुष’ म्हणून लोकांना भुलवत असल्याचेही तपासात समोर आले. साप, वाघ यांचा वापर करून भीती निर्माण केली जात असल्याचा आरोप असून, कस्तुरीसारख्या वस्तूंचा वापर करून वन्यजीव कायद्याचे उल्लंघन झाल्याची शक्यता तपासली जात आहे. बचाव पक्षाने सात दिवसांत पुरेसा तपास झाल्याचा दावा करत पुढील पोलीस कोठडीची गरज नसल्याचे सांगितले. मात्र, सरकारी पक्षाने प्रकरणाची व्याप्ती मोठी असल्याचे सांगत पुढील तपासासाठी कोठडी आवश्यक असल्याचे ठामपणे मांडले. या सर्व युक्तिवादानंतर न्यायालयाने आरोपीला 29 मार्चपर्यंत पोलीस कोठडी सुनावली. प्रकरणातील गंभीर आरोप आणि नव्या उघडकीमुळे पुढील काही दिवसांत आणखी धक्कादायक माहिती समोर येण्याची शक्यता व्यक्त केली जात आहे.
