Ashish Shelar : मुंबईला अतिक्रमणमुक्त करण्यासाठी अनधिकृत बांधकामे शोधण्याकरिता उपग्रह नकाशे आणि ड्रोनसह विविध तंत्रज्ञानाचा वापर करावा. तसेच एप्रिल महिन्याच्या अखेरपर्यंत यासंदर्भात एक ठोस कृती आराखडा तयार करावा, असे निर्देश मंत्री आशिष शेलार (Ashish Shelar) यांनी अधिकाऱ्यांना दिले आहेत. शेलार यांनी शहरात वाढणाऱ्या अतिक्रमणांचा आढावा घेण्यासाठी मंत्रालयात एका बैठकीचे आयोजन केले होते. शेलार (Ashish Shelar) यांनी सांगितले की, मुंबईतील नाले, नद्या आणि मोकळ्या जागांवरील अतिक्रमणे हटवल्याशिवाय शहराचा शाश्वत विकास होणे शक्य नाही. सर्व संबंधित यंत्रणांनी एकमेकांशी समन्वय साधून काम करावे आणि अतिक्रमणांवर टप्प्याटप्प्याने कारवाई करण्यासाठी एक सविस्तर आराखडा तयार करावा. गेल्या दोन दशकांत शहरात उभी राहिलेली अतिक्रमणे आणि अनधिकृत बांधकामांचा अधिकाऱ्यांनी या बैठकीत आढावा घेतला. Ashish Shelar यावेळी शहराच्या अनेक भागांमध्ये अनधिकृत बांधकामे उभारली गेल्याचे, तसेच इमारतींना अतिरिक्त मजले चढवण्यात आल्याचे निदर्शनास आले. शेलार (Ashish Shelar) यांनी संबंधित विभागांना निर्देश दिले की, आधुनिक प्रणालीचा वापर करून, त्यासोबतच उपग्रह नकाशे, ड्रोन सर्वेक्षणे आणि मोबाईल ॲप्लिकेशन्सच्या मदतीने अतिक्रमणांचे नकाशे तयार करावेत आणि या अतिक्रमणांचा सामना करण्यासाठी एक संयुक्त कृती आराखडा तयार करावा. तसेच पुढील कार्यवाहीसाठी हा प्रस्तावित कृती आराखडा मुख्यमंत्री देवेंद्र फडणवीस यांच्यासमोर सादर केला जाईल, असेही त्यांनी यावेळी स्पष्ट केले.
