मुंबई – बॉलीवूड स्टार शाहरुख खानचा मुलगा आर्यन खानशी संबंधित क्रूझ ड्रग प्रकरणात आरोपपत्र दाखल करण्यासाठी नार्कोटिक्स कंट्रोल ब्युरोच्या विशेष तपास पथकाला (NCB SIT) 60 दिवसांचा अवधी मिळाला आहे. दरम्यान, एनसीबीने 90 दिवसांची मुदत मागितली होती, मात्र अतिरिक्त सत्र न्यायाधीश व्ही.व्ही.पाटील यांनी 60 दिवसांची मुदत दिली आहे. या प्रकरणी आरोपपत्र दाखल करण्यासाठी वेळ वाढवण्याच्या एनसीबीच्या मागणीवर बुधवारी सुनावणी पूर्ण झाली. एनसीबीचे वकील अद्वैत सेठना यांनी एनडीपीएस कोर्टाला सांगितले की, या प्रकरणात पुण्यातील सीएफएसएल लॅबमध्ये तपासणीसाठी पाठवलेले सर्व 17 नमुने सायकोट्रॉपिक ड्रग पॉझिटिव्ह असल्याचे आढळून आले आहे. याचा अर्थ आमचा तपास योग्य मार्गावर आहे. या खटल्यात आतापर्यंत 69 साक्षीदारांचे जबाब नोंदवण्यात आले आहेत. 10 स्वतंत्र साक्षीदारांचे जबाब नोंदविण्यात आले आहेत, परंतु 4 अद्याप प्रलंबित आहेत. 19 संशयितांचे जबाब नोंदवण्यात आले आहेत, तर 15 प्रमुख संशयितांचे जबाब नोंदवायचे आहेत. त्याला 90 दिवसांची मुदतवाढ द्यावी, अशी मागणी एनसीबीने केली होती. या प्रकरणात कारागृहात असलेल्या दोन्ही आरोपींच्या वकिलांनी मुदतवाढीच्या मागणीला विरोध केला होता. दरम्यान, या प्रकरणात एनसीबीने आर्यन खानसह अन्य 19 जणांना आरोपी बनवले होते. आर्यनला एनसीबीने 3 ऑक्टोबर रोजी मुंबईच्या किनारी भागात एका क्रूझ जहाजातून अटक केली होती. मात्र, नंतर त्याची जामिनावर सुटका करण्यात आली.
