Arshad Warsi : अर्शद वारसीचा ओटीटीवर पुन्हा धमाका! नवी सस्पेन्स-थ्रिलर वेबसिरीज लवकरच येणार प्रेक्षकांच्या भेटीला
Arshad Warsi : अर्शद वारसीच्या आगामी वेब सीरिजचे नाव 'व्हिक्टिम्स' असे आहे. ही एक सस्पेन्स-थ्रिलर सीरिज असणार असून, यामध्ये अर्शद मुख्य भूमिकेत दिसणार आहे.

Arshad Warsi : विनोदी भूमिका असो किंवा गंभीर व्यक्तिरेखा, प्रत्येक भूमिकेतून आपल्या अभिनयाने प्रेक्षकांची मनं जिंकणारा अभिनेता म्हणजे अर्शद वारसी. या अभिनेत्याने ओटीटी विश्वातही आपली वेगळी छाप पाडली आहे. आता त्याच्या चाहत्यांसाठी एक आनंदाची बातमी समोर आली आहे. अर्शद लवकरच आपल्या पाचव्या वेब सीरिजमधून प्रेक्षकांच्या भेटीला येणार आहे.
अर्शद वारसीच्या आगामी वेब सीरिजचे नाव ‘व्हिक्टिम्स’ असे आहे. ही एक सस्पेन्स-थ्रिलर सीरिज असणार असून, यामध्ये अर्शद मुख्य भूमिकेत दिसणार आहे. त्याच्यासोबत अभिनेता करण टॅकर आणि अभिनेत्री रसिका दुग्गल यांच्याही महत्त्वपूर्ण भूमिका असणार आहेत.
या सीरिजची निर्मिती फरहान अख्तर आणि रितेश सिधवानी यांच्या एक्सेल एंटरटेनमेंट या निर्मिती संस्थेअंतर्गत केली जात आहे. तर सिरीजचे दिग्दर्शन मिहिर देसाई करणार आहेत. या सिरीजच्या चित्रीकरणाला सुरुवात झाली असून, सध्या अर्शद वारसीसह संपूर्ण टीम यूकेमध्ये शूटिंग करत आहे.
‘किंग’ चित्रपटातही दिसणार अर्शद वारसी
दरम्यान, अर्शद वारसीच्या आगामी चित्रपटाबाबतही महत्त्वाची माहिती समोर आली आहे. शाहरुख खानच्या बहुप्रतीक्षित ‘किंग’ या चित्रपटात अर्शद पाहुण्या कलाकाराच्या भूमिकेत दिसणार असल्याचे वृत्त आहे. याशिवाय अर्शद वारसीची लोकप्रिय ‘असुर’ या वेबसीरिजच्या तिसऱ्या सीझनचीही निर्मात्यांनी घोषणा केली आहे. त्यामुळे अर्शदच्या चाहत्यांसाठी आगामी काळ मनोरंजनाने भरलेला असणार आहे.






