पिंपरी – बसची प्रतीक्षा नको म्हणून प्रवासी शेअर रिक्षाकडे वळतात. मात्र, हीच गरज आता प्रवाशांच्या अडचणीचे कारण ठरत आहे. पिंपरी-चिंचवड शहरातील अनेक मार्गांवर शेअर रिक्षाचालकांकडून मनमानी सुरू असल्याच्या तक्रारी आहेत.

ठराविक दरापेक्षा अधिक भाडे आकारले जात आहे. एका रिक्षात क्षमतेपेक्षा जास्त प्रवासी बसवले जात आहेत. मीटरने प्रवास करणाऱ्या रिक्षांना काही ठिकाणी स्टँडवर थांबण्यास विरोध केला जात असल्याने प्रवाशांमध्ये नाराजी आहे.
पिंपरी, चिंचवड, आकुर्डी, दापोडी, निगडी, सांगवी आणि भोसरी परिसरात दररोज मोठ्या संख्येने नागरिक प्रवास करतात.

नोकरी, व्यवसाय आणि शिक्षणासाठी ये-जा करणाऱ्यांची संख्या मोठी आहे. त्यामुळे या मार्गांवर शेअर रिक्षांना मोठी मागणी असते. गर्दीच्या वेळेत बस उशिरा मिळते. बसमध्ये मोठी गर्दी असते. खास रिक्षा करून जाणे परवडत नाही. त्यामुळे अनेक जण शेअर रिक्षाचा पर्याय निवडतात. या परिस्थितीचा फायदा काही चालक घेत असल्याचे प्रवाशांचे म्हणणे आहे.

जादा भाड्याची वसुली
शहरातील काही मार्गांवर पूर्वी १० ते १२ रुपये असलेले भाडे आता १५ ते २० रुपयांपर्यंत आकारले जात असल्याच्या तक्रारी आहेत. प्रवाशांनी भाड्याबाबत विचारणा केल्यास काही चालकांकडून अरेरावी केली जाते, असा आरोप आहे.

विशेषतः ज्‍या मार्गांवर प्रवाशांना पर्याय कमी असतो. त्यामुळे मागेल ते भाडे देण्याची वेळ येते. याचा सर्वाधिक फटका दररोज प्रवास करणाऱ्या कामगार आणि विद्यार्थ्यांना बसतो.

रिक्षात कोंबले जाताहेत प्रवासी
शेअर रिक्षामध्ये क्षमतेपेक्षा अधिक प्रवासी बसविण्याचे प्रकारही सर्रास होत असल्याचे चित्र आहे. काही रिक्षांमध्ये चालकाच्या दोन्ही बाजूंना प्रवासी बसवले जातात.

मागील आसनावरही जास्त प्रवासी घेतले जातात. यामुळे प्रवाशांच्या सुरक्षिततेचा प्रश्न निर्माण झाला आहे. चालकाला वाहन नियंत्रित करताना अडचण येऊ शकते. अचानक ब्रेक लावल्यास अपघाताचा धोका वाढतो.

मीटर रिक्षांना विरोध?
शेअर रिक्षांच्या मनमानीमुळे मीटरप्रमाणे प्रवासी वाहतूक करणाऱ्या रिक्षाचालकांनाही अडचणी येत असल्याच्या तक्रारी आहेत. काही स्टँडवर मीटर रिक्षांना थांबण्यास विरोध केला जात असल्याचे प्रवाशांचे म्हणणे आहे. यामुळे अधिकृत दराने प्रवास करण्याची इच्छा असलेल्या नागरिकांसमोर पर्याय कमी राहतो. परिणामी जादा भाडे देण्याची वेळ येते.

या भागांत सर्वाधिक तक्रारी
पिंपरी-चिंचवड लिंक रोड, चिंचवड स्‍टेशन ते चिंचवड गाव, निगडी ते दापोडी, नाशिक फाटा ते मोशी, निगडी ते भोसरी, डांगे चौक, ते सांगवी, पिंपरी ते काळेवाडी फाटाया परिसरात शेअर रिक्षांची मोठी वर्दळ असते.

सकाळी आणि सायंकाळी या भागात प्रवाशांची गर्दी वाढते. याच काळात शेअर रिक्षांची मागणीही वाढते. त्यामुळे भाडेवाढ आणि क्षमतेपेक्षा अधिक प्रवासी घेण्याचे प्रकार वाढत असल्याचे प्रवाशांचे म्हणणे आहे.

प्रवाशांकडून कडक कारवाईची मागणी
शेअर रिक्षांच्या अनधिकृत स्टँडवर कारवाई करावी. जादा भाडे आकारणाऱ्यांवर दंड ठोठावावा. क्षमतेपेक्षा जास्त प्रवासी घेणाऱ्या रिक्षांची तपासणी करावी. मीटर रिक्षांना अडथळा आणणाऱ्यांवरही कारवाई करावी, अशी मागणी प्रवाशांकडून होत आहे. प्रवाशांची अपेक्षा स्पष्ट आहे.

रिक्षा सेवा नागरिकांच्या सोयीसाठी आहे. ती मनमानीचे साधन बनू नये. वाहतूक पोलिस आणि आरटीओने संयुक्त तपासणी मोहीम राबवावी. नियम मोडणाऱ्या चालकांवर कठोर कारवाई करावी. तसेच अधिकृत भाडे आणि प्रवासी क्षमतेची माहिती प्रमुख रिक्षा स्टँडवर ठळकपणे लावावी, अशी मागणी होत आहे.

pune : गणेशोत्सवाच्या तोंडावर मिठाईचा गोडवा फिका