Apurva Nemlekar:  मराठी अभिनेत्री अपूर्वा नेमळेकरने नव्या आयुष्याला सुरू केली आहे. अलिकडेच ती पती तनुज गोवळकरसोबतचे अनेक रिल्स सोशल मीडियावर शेअर करत असते. मात्र अपूर्वाच्या वजनावरुन एका महिलेने वाईट कमेंट केली होती. त्यानंतर त्या महिलेला अपूर्वाने चांगलंच सुनावलं. तिच्या या पोस्टवर अनेकांनी कमेंट करत तिला पाठिंबा दर्शवला. आता मिळालेल्या पाठिंब्या बाबत अपूर्वाने पोस्ट शेअर करत चाहत्यांचे आभार मानले आहेत.

अपूर्वा नेमळेकर पोस्ट

अपूर्वा नेमळेकर पोस्टमध्ये लिहिले की, माझ्या लाडक्या प्रेक्षकांसाठी… मनापासून काहीतरी ! गेल्या काही दिवसांत घडलेल्या प्रसंगावर एका बाईने माझ्याबद्दल जी वाईट कमेंट केली, त्यामुळे मी जितकी दुखावले गेले, त्याहून अधिक त्रास माझ्या प्रेक्षकांना झाला हे मी पाहिलं. मीडियानेही याची दखल घेतली आणि अनेकांनी मला ‘इग्नोर कर’ असा प्रेमाचा सल्ला देत धीर दिला.

या संपूर्ण प्रकारातून दोन गोष्टी प्रकर्षाने समोर आल्या. पहिली- समाजात वाईट वृत्तीचे लोक असतातच आणि जेव्हा एक बाईच दुसऱ्या बाईला खाली खेचण्याचा प्रयत्न करते, तेव्हा जास्त वाईट वाटतं. पण दुसरी आणि सर्वात महत्त्वाची गोष्ट म्हणजे – तुमचं माझ्यावर असलेलं अथांग आणि निस्वार्थ प्रेम.”

FACEBOOK असो वा INSTAGRAM, मी स्वतः तुमचे पाठवलेले मेसेज वाचले आणि शक्य तितक्या प्रत्येकाला उत्तर देण्याचा प्रयत्न केला. तुमचं हे पाठबळ बघून अक्षरशः माझं मन भरून आलंय. आज मला जाणीव झाली आहे की तुम्ही माझ्याकडून किती अपेक्षा ठेवता, आणि म्हणूनच माझी जबाबदारी आता अजून वाढली आहे. मी तुमची आयुष्यभरासाठी ऋणी आहे. तुमचं हे प्रेम असंच कायम राहो. मी वचन देते – वेगवेगळ्या माध्यमातून आणि नवनवीन कलाकृतींमधून तुम्हा सगळ्यांचं निरंतर मनोरंजन करत राहीन ! मनापासून खूप खूप प्रेम आणि कृतज्ञता, असे म्हणत तिने पाठिंबा देणाऱ्यांचे आभार मानले.

अपूर्वा नेमळेकर गोवळकर

यासोबतच या पोस्टच्या कमेंट सेक्शनमध्ये अपूर्वाने ट्रोलर महिलेबाबत लिहिले की, या ज्या व्यक्ती आहेत, त्यांचं नाव राजश्री विरनक असं आहे. त्या ठाणे महानगरपालिकेच्या अतिक्रमण विभागात कार्यरत आहेत. एवढ्या जबाबदार प्रशासकीय यंत्रणेत आणि महत्त्वाच्या विभागात एका पदावर काम करत असताना, त्यांच्याकडून किमान नागरी भान आणि नैतिक जबाबदारीची अपेक्षा असते. एका शासकीय सेवेत असलेल्या सुशिक्षित व्यक्तीने सार्वजनिक किंवा सोशल मीडियावर अशा प्रकारची भूमिका घेणे हे खरंच धक्कादायक आहे.

महिलेने केलेली कमेंट

अपूर्वाच्या एका पोस्टवर एका महिलेने कमेंट केलेली की, किती जाड आणि वयस्कर दिसते ही अपूर्वा म्हातारी. मेकअप मुळे बरी दिसते नाहीतर चेहरा हिचा लूज पडलेला आहे. नशीब लहान वयाच्या मुलासोबत लग्न केलं. हिचं पंचवीस वर्षापूर्वी लग्न झालं असतं तर हिचा मुलगा आता नवरा केला त्याच्या वयाचा असता. ठीक आहे. लहान तर लहान लग्नाची हौसतर झाली. नवरोबाची आई वाटते ही नुसतं सुंदर असूनही उपयोग नाही. शेवटी नशीब…’ यावर अपूर्वानेही, “स्वतःच्या आयुष्यात किती रिकामेपणा आणि नैराश्य असलं की, एका अनोळखी माणसाच्या दिसण्यावर आणि लग्नावर इतकं घाणेरडं भाष्य करावं लागतं? मला याने काहीच फरक पडत नाही, पण ही विकृती समोर येणं गरजेचं होतं,” असे म्हणत प्रत्युत्तर दिले आहे.

हेही वाचा: 

Raj Thackeray : साहिल वाकोडे प्रकरणात ‘जात’ हा मुद्दा पुढे येताच राज ठाकरेंनी परखडपणे मांडली भूमिका; विद्यार्थांना केलं आवाहन