आज सगळीकडे डॉ. बाबासाहेब आंबेडकर यांची जयंती साजरी केली जात आहे. यादरम्यान मराठी अभिनेत्री अपूर्वा नेमळेकर हिने एक भावनिक पोस्ट केली आहे. तिचा भाऊ ओमकार नेमळेकर याचं 14 एप्रिल 2023 रोजी वयाच्या 28 व्या वर्षी निधन झालं होतं. त्याला हार्ट अटॅकमुळे आपला जीव गमवावा लागला होता. यामुळे अपूर्वा नेमळेकरने आपल्या भावासाठी एक भावनिक पोस्ट लिहिली आहे.

 

View this post on Instagram

 

A post shared by Apurva Nemlekar (@apurvanemlekarofficial)

काय लिहिले पोस्टमध्ये?
’14 एप्रिल- ज्या दिवसाने सर्वकाही बदललं. फक्त माझ्या लहान भावालाच नाही तर माझ्या आत्म्याच्या एका भागाला गमावून आज दोन वर्षे झाली. असा एकही दिवस गेला नाही, जेव्हा मला तुझी आठवण आली नसेल, ओमकार. दररोज सकाळी मी हीच इच्छा मागते की कदाचित नशिबाने थोडी दया दाखवायला हवी होती, कदाचित.. कदाचित मी परत जाऊन तो एक दिवस बदलू शकले असते. 14 एप्रिल 2023.. माझ्या आयुष्यातील सर्वांत वाईट दिवस’,

‘माझ्यापेक्षा वयाने लहान असलास तरी तू माझा मार्गदर्शक, माझा सर्वांत चांगला मित्र, माझा टीकाकार आणि ज्ञानाचा साठा होतास. तू माझा आधारस्तंभ होतास, ज्याच्याकडे मी माझी सर्वसामान्य किंवा अत्यंत क्लिष्ट अशा प्रश्नांची उत्तरं शोधू शकत होते. एका भावापेक्षाही तू बरंच काही होतास. तू माझा साथीदार आणि माझी सुरक्षित जागा होतास,’ असे तिने आपल्या पोस्टमध्ये म्हंटले आहे.

तसेच तिने पुढे म्हंटले ‘या दोन वर्षांत मी खूप काही गमावले आहे. असे असंख्य क्षण आले जेव्हा मी आजूबाजूला पाहिलं आणि तू तिथे हसत, चिडवत, सल्ला देत किंवा जसा आहेस तसा असायला हवं होतं अशी इच्छा व्यक्त केली. आयुष्य पुढे गेलंय, पण मी अजूनही पुढे गेले नाही. मी खरंच कधी पुढे जाईन असं मला वाटत नाही.’

‘मी काहीही करू न शकल्याची अपराधीपणाची भावना सतत मनात रेंगाळत राहते. या भावनेनं दररोज माझं हृदय जड होतं. तू जिथे कुठे असशील तिथे शांतीने असशील अशी मी अपेक्षा करते. पण तू नसल्याचं दु:ख माझ्यासोबत कायम असेल. तुझी प्रचंड आठवण येते, ओम. तू इथे असायला पाहिजे होतंस, असं मला खूप वाटतं,’ अशा शब्दांत अपूर्वाने आपले दुःख व्यक्त केले आहे.

अपूर्वा नेमळेकर च्या कामाबद्दल बोलायचे झाल्यास झी मराठीवरील आभास हा या मालिकेतून तिने कलाक्षेत्रात पदार्पण केलेले. त्यानंतर तिने काही मालिका केल्या पण तिला खरी ओळख रात्रीस खेळ चाले या मालिकेतल्या शेवंता या पात्रामुळे मिळाली.