Apple India Launch: अमेरिकेतील प्रसिद्ध तंत्रज्ञान कंपनी Apple Inc. ने भारतीय बाजारात आपला नवीन किफायतशीर स्मार्टफोन आयफोन १७ई लाँच केला आहे. प्रीमियम फीचर्स कमी किमतीत देण्याचा कंपनीचा दावा आहे. मागील वर्षी आयफोन १६ई सादर केल्यानंतर आता या नव्या मॉडेलमध्ये अनेक सुधारणा करण्यात आल्या आहेत. काही वैशिष्ट्ये तर प्रो सिरीजची आठवण करून देणारी आहेत. आयफोन १७ईमध्ये ६.१ इंचाचा सुपर रेटिना एक्सडीआर ओएलईडी डिस्प्ले देण्यात आला आहे. एचडीआर सपोर्टमुळे व्हिडिओ आणि फोटो अधिक स्पष्ट आणि रंगीत दिसतात. स्क्रीनवर सेरामिक शिल्ड २ संरक्षण दिले आहे, जे पडल्यास अधिक सुरक्षितता देते. फोनला फ्लॅट एज फ्रेमसह अॅल्युमिनियम बॉडी देण्यात आली असून मागील बाजूस ग्लास फिनिश आहे. त्यामुळे फोनला प्रीमियम लुक मिळतो. हा स्मार्टफोन आयपी६८ रेटिंगसह येतो. म्हणजेच पाणी आणि धुळीपासून त्याचे संरक्षण होते. यामध्ये मॅगसेफ सपोर्ट देण्यात आला आहे. त्यामुळे मॅग्नेटिक वायरलेस चार्जर, वॉलेट आणि इतर अॅक्सेसरीज थेट फोनच्या मागील बाजूस जोडता येतात. परफॉर्मन्सच्या बाबतीत या फोनमध्ये नवीन ए१९ चिपसेट देण्यात आला आहे. हा ३ नॅनोमीटर प्रोसेसवर आधारित आहे. कंपनीच्या म्हणण्यानुसार, यामुळे अधिक वेगवान कामगिरी आणि कमी वीज वापर मिळतो. गेमिंग, व्हिडिओ एडिटिंग आणि मल्टिटास्किंग करताना स्मूद अनुभव मिळेल, असा दावा करण्यात आला आहे. Apple iPhone 17e आयफोन १७ई नवीन आयओएस आवृत्तीवर चालतो. यात कृत्रिम बुद्धिमत्ता आधारित काही नवीन फीचर्स, सुधारित सिरी इंटिग्रेशन आणि ऑन-डिव्हाइस प्रोसेसिंग सुविधा देण्यात आली आहे. वापरकर्त्यांच्या गोपनीयता आणि सुरक्षिततेवर कंपनीने विशेष भर दिला आहे. कॅमेऱ्याबाबत बोलायचे झाल्यास, या फोनमध्ये ४८ मेगापिक्सलचा मुख्य रिअर कॅमेरा देण्यात आला आहे. उच्च दर्जाचे फोटो घेण्यासाठी अॅपलची प्रगत इमेज प्रोसेसिंग तंत्रज्ञान वापरण्यात आले आहे. यामध्ये २x लॉसलेस झूम, नाईट मोड, स्मार्ट एचडीआर आणि ४के व्हिडिओ रेकॉर्डिंगची सुविधा आहे. पुढील बाजूस १२ मेगापिक्सलचा ट्रूडेप्थ कॅमेरा आहे, जो फेस आयडी सपोर्ट करतो. सेल्फी आणि व्हिडिओ कॉलिंगसाठी अधिक स्पष्टता मिळते. बॅटरी क्षमतेची अचूक माहिती कंपनीने दिलेली नाही. मात्र हा फोन दिवसभराचा बॅकअप देईल, असा दावा करण्यात आला आहे. व्हिडिओ प्लेबॅक वेळ मागील मॉडेलपेक्षा अधिक असल्याचे सांगितले आहे. फोनमध्ये यूएसबी-सी पोर्ट देण्यात आला असून फास्ट चार्जिंग आणि मॅगसेफ वायरलेस चार्जिंगला सपोर्ट आहे. किंमतीबाबत बोलायचे झाल्यास, आयफोन १७ईची सुरुवातीची किंमत ६४,९०० रुपये आहे. टॉप व्हेरिएंटची किंमत ८४,९०० रुपये ठेवण्यात आली आहे. हा स्मार्टफोन ब्लॅक, पिंक आणि व्हाइट अशा रंगांमध्ये उपलब्ध असेल. विक्री ११ मार्चपासून सुरू होणार असून ऑनलाइन आणि ऑफलाइन दोन्ही माध्यमांतून तो खरेदी करता येईल. कमी किमतीत प्रीमियम फीचर्स देण्याचा प्रयत्न म्हणून आयफोन १७ईकडे पाहिले जात आहे. मध्यम बजेटमध्ये उच्च दर्जाचा अनुभव घेऊ इच्छिणाऱ्या ग्राहकांसाठी हा एक आकर्षक पर्याय ठरू शकतो.
