Pallavi Vichare : मराठी मनोरंजनसृष्टीतील लोकप्रिय अभिनेता अंशुमन विचारे सध्या त्याच्या नव्या घरामुळे चर्चेत आहे. अंशुमनने नुकतंच स्वतःचं नवीन घर खरेदी केलं असून, काही दिवसांपूर्वी त्याने चाहत्यांसोबत आपल्या नव्या घराची झलकही शेअर केली होती.

घराचा व्हिडीओ पाहिल्यानंतर चाहत्यांनी त्याच्यावर शुभेच्छांचा वर्षाव केला. पण एक कमेंट मात्र वेगळी होती. ज्यानंतर अंशुमन यांच्या पत्नीने या कमेंटचा स्क्रिनशॅाट त्यांच्या इंन्स्टाग्रामवरून शेअर करत कमेंट करणाऱ्याला चोख प्रत्युत्तर देत भलीमोठी पोस्ट लिहिली आहे.  (Pallavi Vichare)

अंशुमन विचारे आणि त्याची पत्नी पल्लवी विचारे यांनी नव्या घराचा व्लॉग सोशल मीडियावर शेअर केला. या व्लॉगमध्ये त्यांच्या घरात दोन स्वतंत्र मंदिरं असल्याचं दिसून आलं. एका मंदिरात हिंदू देवी-देवतांच्या मूर्ती होत्या, तर दुसऱ्या मंदिरात गौतम बुद्धांची मूर्ती ठेवण्यात आली होती.  (Pallavi Vichare)

यावर एका नेटकऱ्याने खोचक कमेंट करत अंशुमनच्या घरातील धार्मिक श्रद्धांवर प्रश्न उपस्थित केला. “अंशुमन विचारेने घरात भगवान बुद्धांची मूर्ती बसवली आहे. आणि गळ्यात काय हनुमान… ओठात एक आणि पोटात एक करण्याची काय गरज?” अशी कमेंट या नेटकऱ्याने केली.

 

View this post on Instagram

 

A post shared by Adv Pallavi Vichare (@pallavi_a_vichare)

पल्लवी विचारेंचा सणसणीत पलटवार  (Pallavi Vichare)

या कमेंटचा पल्लवी विचारे यांनी चांगलाच समाचार घेतला. त्यांनी संबंधित कमेंटचा स्क्रीनशॉट आपल्या इन्स्टाग्राम स्टोरीवर शेअर करत सविस्तर उत्तर दिलं. पल्लवी म्हणाल्या, “कारण तो तुझ्यासारख्या विचारसरणीचा नाही आहे… म्हणूनच त्याने बुद्धांची मूर्ती घरात बसवली आणि त्यासाठी स्पेशल वेगळं मंदिरसुद्धा केलं. कारण फक्त त्याची बायको बुद्धिष्ट आहे, तो नाही.”

पुढे त्यांनी अंशुमनच्या गळ्यातील हनुमानाच्या लॉकेटचाही संदर्भ देत उत्तर दिलं. “गळ्यात हनुमान आहे कारण तो हिंदू मराठा आहे. त्याच्या ओठात आणि पोटात सगळीकडे एकच अतिशय चांगला माणूस आहे… जो तुझ्यासारखा भेदभाव करत नाही.” अशा शब्दांत पल्लवी यांनी कमेंट करणाऱ्याला सुनावलं.

माझा नवरा ९६ कुळी मराठा  (Pallavi Vichare)

माझा नवरा ९६ कुळी मराठा आहे. पण जात, धर्म किंवा पंथाच्या नावावर भेदभाव करणं त्याच्या स्वभावातच नाही. उलट कोणत्याही प्रकारचा भेदभाव त्याला अजिबात आवडत नाही. हिंदू, मुस्लिम, ख्रिश्चन, पारशी, बौद्ध… आणि असंख्य जाती-जमातींची माणसं त्याचे जिवलग मित्र आहेत. त्यांच्या सुख-दुःखात स्वतःच्या माणसासारखा उभा राहणारा, त्यांच्यासाठी काहीही करण्याची तयारी असलेला तो माणूस आहे. अशा शब्दांत पती अशुंमन यांचं कौतुक केलं.

पुढे पोस्टमध्ये त्या म्हणतात, आणि सगळ्यात सुंदर गोष्ट म्हणजे मी बौद्ध असूनही आमच्यात कधी ह्या गोष्टी ने काहीच फरक पडला नाही माझा नवरा नेहमी बाबासाहेबांच्या जयंती मधे जातो, घोषणा देतो आणि बुद्धाच्या चरणी नतमस्तक होतो , तितक्याच श्रद्धेने जितक्या श्रद्धेने तो स्वामींच्या चरणी डोक ठेवतो .

आमच्या घरात दोन मंदिरं आहेत…  (Pallavi Vichare)

एक त्याचं, एक माझं. तो माझ्या देवासमोर श्रद्धेने नतमस्तक होतो, मी त्याच्या देवासमोर. आणि आमची लेक तर दोन्ही मंदिरांत तितक्याच प्रेमाने पूजा करते. कारण आमच्या घरात धर्म वेगळे असले तरी श्रद्धा एक आहे, माणुसकी एक आहे आणि प्रेम त्याहून मोठं आहे. शेवटी घर भिंतींनी बनत नाही, आणि नातं जात-धर्माने ठरत नाही…माणसाला माणूस म्हणून स्वीकारण्याची तयारी असेल, तर प्रत्येक धर्माच्या देवाला त्या घरात जागा मिळते. हीच खरी समता…आणि कदाचित बाबासाहेबांनी दाखवलेल्या मार्गाचा खरा अर्थही हाच. असा पोस्टचा शेवट पल्लवी विचारे यांनी केला आहे.

दरम्यान, या पोस्टवर मराठी कलाकारांसह अंशुमनच्या असंख्य चाहत्यांनी कमेंट्स करत पल्लवीचं कौतुक केलं आहे. अंशुमन आणि पल्लवी यांनी आपल्या नव्या घरात विविध श्रद्धांचा केलेला सन्मान आणि त्यावर आलेल्या कमेंटला दिलेलं उत्तर सध्या चर्चेचा विषय ठरत आहे.

India GDP: भारताच्या जीडीपी वाढीमुळे IMF ला धक्का ; म्हणाले,”निकाल हे दर्शवतात की…”