Plane crash in Baramati : पुणे जिल्ह्यातील बारामती विमानतळ परिसरातून एक धक्कादायक घटना समोर आली आहे. बारामती विमानतळाच्या हद्दीत एक शिकाऊ विमान कोसळल्याची माहिती मिळाली असून, या दुर्घटनेमुळे परिसरात एकच खळबळ उडाली आहे.

प्राथमिक माहितीनुसार, प्रशिक्षणासाठी वापरले जाणारे हे विमान अचानक कोसळले. मात्र, विमान अपघाताचे नेमके कारण अद्याप स्पष्ट झालेले नाही. या घटनेची माहिती मिळताच संबंधित प्रशासन आणि आपत्कालीन यंत्रणांनी घटनास्थळी धाव घेतली. अपघातग्रस्त परिसराची पाहणी सुरू असून, दुर्घटनेमागील कारणांचा तपास केला जात आहे.

नेमकं काय घडलं? 

मिळालेल्या माहितीनुसार, VT-SEX या प्रशिक्षण विमानातून कॅप्टन चिराग शशिकांत दोईफोडे आणि कॅडेट अभिजीत जुंद्रे हे ‘सर्किट अँड लँडिंग इमर्जन्सीज’ या प्रशिक्षणाचा सराव करत होते. सकाळी विमानाने प्रशिक्षणासाठी उड्डाण केले. प्रशिक्षण उड्डाणादरम्यान प्रशिक्षण विमानाचा धावपट्टीवरील ताबा सुटल्याने ते धावपट्टीबाहेर गेल्याची घटना घडली. या घटनेत कोणतीही जीवितहानी किंवा दुखापत झाली नसल्याची माहिती समोर आली आहे.

प्रशिक्षणादरम्यान प्रथम धावपट्टी क्रमांक 29 वर आणि त्यानंतर धावपट्टी क्रमांक 11 वर ‘रिजेक्टेड टेक-ऑफ’चा सराव करण्यात आला. मात्र, सराव सुरू असताना विमान धावपट्टीवर पूर्णपणे थांबविण्यात यश आले नाही. त्यामुळे विमान धावपट्टी क्रमांक 29 च्या टोकापुढे गेले आणि उजव्या बाजूला धावपट्टीबाहेर निघून गेले. घटनेनंतर विमान सुरक्षित करण्यात आले असून वैमानिक आणि कॅडेट दोघेही सुरक्षित आहेत.