पुणे: मुंढवा आणि बोपोडीतील सरकारी जमीन गैरव्यवहारानंतर आता पिंपरी-चिंचवडजवळील ताथवडे (Tathawade) येथे राज्य सरकारच्या पशुसंवर्धन खात्याच्या मालकीची तब्बल १५ एकर जमीन परस्पर विकल्याचा तिसरा मोठा घोटाळा उघडकीस आला आहे. कोट्यवधी रुपयांचा हा बेकायदा व्यवहार जानेवारी २०२५ मध्ये झाला असून, शासनाला कोणतीही माहिती न देता हा व्यवहार करण्यात आला आहे. या प्रकरणी महसूल मंत्री चंद्रशेखर बावनकुळे यांनी तातडीने कठोर भूमिका घेत हवेलीच्या सहाय्यक दुय्यम निबंधक विद्या शंकर बडे (सांगळे) यांना निलंबित केले आहे. नेमकं प्रकरण काय? पिंपरी-चिंचवड भागातील ताथवडे येथील पशुसंवर्धन खात्याच्या मालकीची सुमारे १५ एकर (६ हेक्टर ३२ आर) जमीन खात्याला पूर्णपणे अंधारात ठेवून परस्पर विकण्यात आली आहे. पशुसंवर्धन खात्याच्या ७/१२ उताऱ्यावरील इतर अधिकारामध्ये ‘आयुक्त पशुसंवर्धन यांचा ताबा असून शासनाच्या परवानगीशिवाय विक्रीस बंदी’ असा स्पष्ट शेरा असतानाही हा व्यवहार करण्यात आला. हेरंब गुपचूप नामक व्यक्तीने ९ जानेवारी २०२५ रोजी (दस्त क्रमांक ६८५/२०२५) ही जमीन पशुसंवर्धन विभागाला अंधारात ठेवून परस्पर विक्री केली. विक्री व्यवहाराचा दस्त झाल्याची माहिती मिळाल्यानंतर पशुसंवर्धन खात्याकडून पुणे विभागीय आयुक्तांकडे तक्रार करण्यात आली, त्यानंतर हा धक्कादायक प्रकार उघडकीस आला. परवानगीशिवाय झाला व्यवहार – ताथवडे येथील सर्वे नंबर २० मधील या जागेसंदर्भात उच्च न्यायालयात दावा दाखल असला तरी, कोर्टाने मालकीसंदर्भात कोणतेही भाष्य केलेले नव्हते. त्यामुळे ७/१२ उताऱ्यावर इतर अधिकारामध्ये पशुसंवर्धन खात्याचे नाव कायम होते. खात्याच्या परवानगीशिवाय जमिनीचा व्यवहार करता येत नसतानाही, संबंधित दुय्यम निबंधकांनी नोंदणी करताना गंभीर अनियमितता केल्याचे समोर आले आहे. दस्त नोंदवताना अद्ययावत ७/१२ उतारा जोडलेला नव्हता; तर दस्तासोबत जोडलेल्या जुन्या उताऱ्यावर शासनाचा ताबा किंवा विक्रीवरील बंदीचा उल्लेख नव्हता. महत्त्वाचे म्हणजे, फेब्रुवारी २०२५ मधील अद्ययावत ७/१२ उताऱ्यावर बंदीचा शेरा स्पष्ट असतानाही दुय्यम निबंधकांनी तांत्रिक अडचणीमुळे म्युटेशन होत नव्हते म्हणून ‘स्किप ऑप्शन’ वापरला आणि वरिष्ठांची परवानगी न घेता हा दस्त नोंदवला, अशी माहिती चौकशीत निष्पन्न झाली आहे. सहाय्यक दुय्यम निबंधक निलंबित – पुण्यातील मुंढवा (४० एकर) आणि बोपोडी (१३ एकर) येथील गैरव्यवहारानंतर हा ताथवडेतील तिसरा मोठा घोटाळा उघडकीस आल्याने महसूल विभागात मोठी खळबळ उडाली आहे. या गंभीर अनियमिततेबद्दल राज्याचे महसूल मंत्री चंद्रशेखर बावनकुळे यांनी तात्काळ कारवाई करत हवेलीच्या सहाय्यक दुय्यम निबंधक विद्या शंकर बडे (सांगळे) यांना निलंबित करण्याचे आदेश दिले आहेत. शासकीय ताब्यातील जमीन विक्रीस नोंदवण्याच्या प्रक्रियेतील गैरव्यवहारात सहभागी झाल्याबद्दल त्यांना महाराष्ट्र नागरी सेवा (शिस्त व अपील) नियम १९७९ अंतर्गत १२ नोव्हेंबर २०२५ पासून पुढील आदेश येईपर्यंत निलंबित करण्यात आले आहे. निलंबन काळात त्यांचे मुख्यालय प्रधान मुद्रांक कार्यालय, मुंबई येथे राहील आणि त्यांनी वरिष्ठांच्या पूर्वपरवानगीशिवाय मुख्यालय सोडू नये, असेही सरकारच्या आदेशात स्पष्ट नमूद करण्यात आले आहे. राजकारण तापले – उपमुख्यमंत्री अजित पवार यांचे सुपुत्र पार्थ पवार यांच्या कथित भूखंड घोटाळ्यामुळे राज्याचे राजकारण तापले असतानाच, ताथवडे येथील हा तिसरा घोटाळा समोर आल्याने सरकारवरील दबाव वाढला आहे. पशुसंवर्धन विभागाच्या तक्रारीनंतर आता पुणे विभागीय आयुक्त आणि पशुसंवर्धन विभाग या प्रकरणाचा सखोल तपास करत आहेत. पुण्यातील सरकारी जमिनीच्या या एकापाठोपाठ एक उघडकीस आलेल्या घोटाळ्यांमुळे महसूल विभागात मोठी खळबळ उडाली असून, या सर्व प्रकरणांची चौकशी कधी पूर्ण होणार आणि दोषींवर कठोर कारवाई कधी होणार, याकडे राज्याचे लक्ष लागले आहे.
