Angomcha Bimol Akoijam : कॉंग्रेसचे खासदार अंगोमचा बिमोल अकोइजम (Angomcha Bimol Akoijam) यांना दिल्ली उच्च न्यायालयाने सोमवारी दिलासा दिला. त्यांना लैंगिक छळाच्या आरोपावरून नुकतेच जवाहरलाल नेहरू विद्यापीठाने (जेएनयू) प्राध्यापक पदावरून बडतर्फ केले. त्या बडतर्फी आदेशाला न्यायालयाने स्थगिती दिली. जेएनयूच्या ११ विद्यार्थिनींनी अकोइजम यांच्या विरोधात मेमध्ये लैंगिक छळाच्या तक्रारी दिल्या.

त्या तक्रारींची दखल घेत जेएनयूने मागील महिन्यात अकोइजम (Angomcha Bimol Akoijam) यांना बडतर्फ केले. त्या आदेशाला आव्हान देत अकोइजम यांनी न्यायालयात धाव घेतली. न्यायालयाने त्यांना दिलासा देताना जेएनयूला नोटीस बजावत उत्तर मागवले. संबंधित प्रकरणी पुढील सुनावणी नववर्षाच्या जानेवारीत होईल. अकोइजम यांनी त्यांच्यावरील आरोप फेटाळले.

संबंधित आरोप आणि बडतर्फी म्हणजे मुद्दाम लक्ष्य करण्याचे प्रकार असल्याचा दावा त्यांनी केला. ते मणिपूरचे खासदार आहेत. त्या राज्यातील विधानसभा निवडणूक जवळ येऊन ठेपली आहे. अशात अकोइजम (Angomcha Bimol Akoijam) यांच्याशी संबंधित प्रकरण पुढे आल्याचे राजकीय पडसादही उमटले. संबंधित प्रकरणावरून कॉंग्रेसची कोंडी करण्यासाठी भाजपने देशभरात निदर्शने केली. त्यामुळे न्यायालयाचा निर्णय कॉंग्रेसच्या दृष्टीनेही दिलासादायी ठरला आहे.