विशाखापट्टणम : केवळ एका क्लिकवर लोन म्हणजे कर्ज देणारे अनेक ॲप हल्ली निघाले आहेत. पण अशाच एका लोन ॲपवरून पैसे घेणे आंध्र प्रदेशातील एका तरुणासाठी जीवघेणे ठरले. प्रत्यक्षात त्याने फक्त 2000 रुपये कर्ज घेतले होते. ते परत करण्यासाठी ॲप एजंट त्याला सतत त्रास देत होते. एवढेच नाही तर पैसे परत न केल्याने एजंटांनी तरुणाच्या पत्नीचे आक्षेपार्ह फोटो त्याच्या ओळखीच्या आणि नातेवाईकांना पाठवले.

हा फोटो फेक होता आणि तो काही सॉफ्टवेअरच्या मदतीने बनवण्यात आला होता. मात्र यामुळे तरुणाला इतका मानसिक आघात झाला की त्याने आत्महत्या केली.विशेष म्हणजे या तरूणाने ७ डिसेंबरला प्रेमविवाह केला होता. लग्नानंतर काही दिवसांतच त्याचा मृत्यू झाल्याने त्याच्या कुटुंबीयांना प्रचंड त्रास झाला आहे; त्यांनी या प्रकरणाची चौकशी करून दोषींना शिक्षा करण्याची मागणी केली आहे.

हा फोटो व्हायरल झाल्यानंतर एस.नरेंद्र नावाच्या त्या तरूणाने 2000 रुपये परत केले होते. मात्र असे असतानाही एजंट त्यांना सतत त्रास देत असल्याचा आरोप आहे. यासंदर्भात आता एफआयआर दाखल करण्यात आली असून पोलीस प्रकरणाचा तपास करत आहेत.

पोलिसांनी दिलेल्या माहितीनुसार, याप्रकरणी सायबर तज्ज्ञांची मदत घेतली जात आहे. ॲप कोणी तयार केले? आणि या टोळीत कोण-कोण सामील आहेत? या प्रकरणाची चौकशी करण्यात येत आहे. कुटुंबीयांच्या जबाबाच्या आधारे एफआयआर दाखल करण्यात आला आहे. या प्रकरणाच्या तपासात काही पुरावे मिळाले असून, लवकरच आरोपी पोलिसांच्या हाती लागेल.

एस. नरेंद्र हा व्यवसायाने मच्छीमार असल्याचे समोर आले आहे. सध्या त्याचे काम नीट होत नसल्याने ते आर्थिक संकटात सापडला होता. त्यामुळेच त्याला पैसे देण्यास विलंब झाला होता.