श्री महासाधू मोरया गोसावींच्या संजीवन समाधीचा पावन सहवास चिंचवडमधील श्री क्षेत्र धनेश्वरला लाभला आहे. हे मंदिर दक्षिणवाहिनी पवना नदीच्या काठावर वसलेले आहे. हिरवागर्द परिसर, झुळझुळणारे पवनाजल, शीतल पवन, मंजुळ घंटानाद आणि गोशाळेतील गाईंच्या हंबरण्याचा आवाज यांनी मन प्रसन्न होते. शंभर वर्षांपूर्वीचा पुरातन पिंपळवृक्ष या मंदिरावर छत्रछाया धरताना दिसतो. या वृक्षाच्या बुंध्याभोवती गुलाबी मोहक रंगाच्या पूर्ण विकसित कमळाची उभारणी केली आहे. सभोवती विघ्नेश्वर, दक्षिणमुखी मारुती मंदिर व मुंजोबा यांची मंदिरे आहेत. नक्षीदार स्तंभांवर तोललेला भव्य सभामंडप आहे. छतावरील सुंदर रंगसंगतीतील फुलांचे कोरीवकाम मन वेधून घेते. गर्भगृहातील पूर्वाभिमुख पिंड हे येथील वैशिष्ट्य आहे. पिंडीसमोर प्रसन्न गणेशमूर्ती आहे. तेजस्वी महिषासुरमर्दिनी व गरुडारुढ विष्णू-लक्ष्मीच्या मूर्ती आहेत. धनेश्वर महादेवांचा वैशाख चंदन उटी सोहळा व मोगरा महोत्सव वैशाख शुद्ध प्रतिपदेला असतो. यावेळी संपूर्ण मंदिर गुलाबपुष्पे आणि सुगंधी मोगऱ्याच्या माळांनी सजवतात. महादेवांचे अतिशय सुंदर सालंकृत रूप पाहायला मिळते. भक्तीगीतांचे कार्यक्रम होतात. येथील गोशाळेत वीस गाईंची उत्तम देखभाल केली जाते. दक्षिण वाहिनी नदी आणि पूर्वाभिमुख शिवलिंग असे श्रीक्षेत्र त्र्यंबकेश्वर सारखेच स्थान महात्म्य आहे. त्यामुळे इथे ग्रहशांती पूजा करतात. पौराणिक व ऐतिहासिक वारसा या मंदिराला लाभला आहे. – माधुरी शिवाजी विधाटे
