Ranbir Kapoor | बॉलिवूड अभिनेता रणबीर कपूरच्या चित्रपटांनी गेल्याकाही वर्षात बॉक्स ऑफिसवर दमदार कमाई केली आहे. चित्रपटांसोबतच रणबीर कपूर त्याच्या खासगी आयुष्यामुळे देखील नेहमी चर्चेत असतो. नुकतेच, रणबीरने त्याच्या नवीन लाइफस्टाइल ब्रँडची सुरुवात केली. ARKS या लाइफस्टाइल ब्रँडचे स्नीकर्स त्याने अभिनेता अमिताभ बच्चन यांना भेट दिले होते. हे स्नीकर अमिताभ बच्चन यांना एवढे आवडले की, आता त्यांनी रणबीरसाठी खास पत्र लिहिले आहे. अमिताभ बच्चन यांनी रणबीरला हाताने लिहिलेल्या पत्रामध्ये त्याच्या नवीन व्यवसायासाठी शुभेच्छा दिल्या आहेत. तसेच, स्नीकरचे देखील कौतुक केले. रणबीरने काही दिवसांपूर्वीच ARKS नावाचा लाइफस्टाइल ब्रँड सुरू केला आहे. या कंपनीचे स्नीकर्स त्याने अमिताभ बच्चन यांना पाठवले होते. हे स्नीकर्स मिळाल्यानंतर बच्चन यांनी रणबीरसाठी खास पत्र लिहिले. या पत्रात त्यांनी रणबीरसाठी लिहिले की, ‘प्रिय रणबीर, तू दिलेल्या गिफ्टसाठी मी आभारी आहे. एआरकेएसचे स्नीकर मी घालून बघितले. ते खूप छान आहेत आणि कम्फर्टेबल आहेत. तुला तुझ्या या नवीन व्यवसायासाठी खूप शुभेच्छा. खूप प्रेम.’ अमिताभ बच्चन यांनी लिहिलेल्या या पत्राचा फोटो सध्या सोशल मीडियावर व्हायरल होत आहे. रणबीरने व्हॅलेंटाइन डे च्या दिवशी एआरकेएस नावाने लाइफस्टाइल ब्रँड सुरू केला. या ब्रँडच्या माध्यमातून शर्ट, टी-शर्ट, हूडीज, स्नीकर्स, क्रॉप टॉप्ससह अनेक वस्तूंची विक्री केली जाणार आहे. दरम्यान, रणबीर कपूरच्या कामाबद्दल सांगायचे तर त्याच्या ‘अॅनिमल’ चित्रपटातील भूमिकाल प्रेक्षकांनी भरभरून पसंती मिळाली. लवकरच तो ‘रामायण’ चित्रपटातून प्रेक्षकांच्या भेटीला येणार आहे. गेल्या वर्षीच त्याने या चित्रपटाच्या शूटिंगला सुरुवात केली होती. रणबीर लवकरच ‘लव्ह अँड वॉर’ चित्रपटातही झळकणार आहे.
