Smriti Mandhana Wedding Postponed : क्रिकेटर स्मृती मानधना आणि संगीतकार पलाश मुच्छल यांचा बहुप्रतिक्षित विवाह सोहळा २३ नोव्हेंबर रोजी सांगलीत होणार होता, मात्र लग्नाच्या दिवशीच स्मृतीच्या वडिलांची प्रकृती अचानक बिघडल्याने त्यांना तातडीने रुग्णालयात दाखल करण्यात आले. या नाट्यमय घटनेमुळे नियोजित विवाह सोहळा पुढे ढकलण्यात आला आहे. त्यानंतर पलाश मुच्छलची तब्येत बिघडली होती. दरम्यान या सर्व घटनेची सविस्तर माहिती पलाशच्या आईने दिली आहे. स्मृती आणि पलाश यांच्या लग्नापूर्वीचे विधी शुक्रवारपासून सुरू झाले होते आणि रविवारी (२३ नोव्हेंबर) लग्न होणार होते. मात्र, लग्नाला अवघे काही तास शिल्लक असताना स्मृतीचे वडील श्रीनिवास मानधना यांना ह्रदयविकाराची लक्षणे जाणवू लागल्याने त्यांना तत्काळ रुग्णवाहिकेतून रुग्णालयात हलवण्यात आले. पलाशच्या आईने दिला संपूर्ण घटनेचा तपशील – या संपूर्ण प्रकरणाची माहिती पलाश मुच्छलची आई अमिता मुच्छल यांनी ‘हिंदुस्तान टाईम्स’ला दिली आहे. त्यांनी सांगितले की, स्मृतीच्या वडिलांची प्रकृती बिघडल्याची बातमी कळताच पलाशला मोठा धक्का बसला. कारण पलाशचा स्मृतीच्या वडिलांवर प्रचंड जीव आहे आणि त्यांचे नाते स्मृती आणि त्यांच्यापेक्षाही घट्ट आहे. वडिलांची प्रकृती ठीक होईपर्यंत लग्नाचे विधी पुढे ढकलण्याचा निर्णय स्मृतीच्या आधी पलाशनेच घेतला. हेही वाचा – Blind Women T20 World Cup : भारतीय दृष्टीहीन महिला संघाने पटकावला पहिला-वहिला टी-२० विश्वचषक वडिलांना नेमका काय त्रास झाला? आदल्या दिवशी श्रीनिवास मानधना यांनी खूप डान्स केला होता आणि ते खूप आनंदात होते. वरात घेऊन येण्याची तयारी सुरू असताना त्यांना थोडा त्रास जाणवला. सुरुवातीला त्यांनी कोणाला काही सांगितले नाही, पण प्रकृती जास्तच बिघडल्यानंतर रुग्णवाहिका बोलवावी लागली, अशी माहिती अमिता मुच्छल यांनी दिली. पलाशलाही रुग्णालयात दाखल करावे लागले – स्मृतीच्या वडिलांच्या प्रकृतीबद्दल पलाशने खूप जास्त तणाव घेतल्यामुळे त्याची तब्येतही बिघडली. अमिता मुच्छल यांनी सांगितले की, “स्मृतीच्या वडिलांची प्रकृती बिघडल्यामुळे पलाश खूप रडला आणि त्याची तब्येत खूप खराब झाली. त्याला तातडीने रुग्णालयात नेण्यात आले, जिथे त्याला ४ तास ठेवण्यात आले आणि आयव्ही ड्रीप लावण्यात आली. सर्व टेस्ट नॉर्मल आल्या असल्या तरी त्याने खूप ताण घेतला आहे.” हेही वाचा – स्मृती मानधनाच्या वडिलांनंतर आता पलाश मुच्छलची तब्येत बिघडली; नेमकं काय झालं? पलाशचे कुटुंब मुंबईला परतले – स्मृतीच्या वडिलांना रुग्णालयात दाखल केल्यानंतर पलाशला देखील उपचारानंतर रात्री घरी सोडण्यात आले. आता पलाश आणि त्याचे कुटुंबीय मुंबईला परतले असून तो सध्या आराम करत आहे, मात्र तणावाखाली आहे. त्याची बहीणही सांगलीहून मुंबईला त्याच्यासोबत राहण्यासाठी परतली आहे, अशी माहिती अमिता मुच्छल यांनी दिली. आता स्मृती मानधना आणि पलाश मुच्छल यांच्या लग्नाची नवी तारीख लवकरच जाहीर होईल, अशी अपेक्षा आहे.
